Documents | Modify | Uploaded on Sun Aug 25 18:14:03 2013

la katcikatcik zei cmana

By tijlan

la katcikatcik zei cmana

puzubu'uku ge ko'a goi la oji:san laldo nanmu gi ko'e goi la oba:san laldo ninmu

ko'a fi lo cange cu sombo fi'o se sanga { au pa tsiju cu binxo ki'o tsiju } - ku'i lo dalrtanuki goi T poi ca'o zgana la'edi'u ku'o ba lo nu ko'a xruti cliva cu klama lo cange secu'u { ca'e lo pa mei ze'e pa mei } gi'e citka ro lo tsiju u'anai

ze'ubaku zo'e na te tsiju - je ko'a la'edi'u ze'ei uanai zei pensi - ce'obo facki lo du'u T fuzme - ki'uku ko'a sezu'e lo simlu be lo ka ce'u xruti cliva cu denpa lo nu T klama - T ca'a klama - ko'a sepi'o lo skori poi vo'a sabji cu kavbu T

ko'a bevri T lo zdani gi'e cusku fi ko'e fe { uo.u'a kavbu lo palci dalrtanuki - ai ba jukpa ce'o citka lo stasrtanuki } - za'ure'u to'o klama lo cange

bu'u lo zdani ko'e co'a bredi lo nu jukpa lo stasrtanuki - T ii zei fapro fi lo nu se citka gi'e cai zei troci lo nu rivbi - ku'i lgau T po'o no zo'e ca'a tadji lo nu snada cliva lo skori - semu'ibo T cusku fi ko'e fe { doi oba:san lo skori cu tagji co cortu rinka - e'o gau ko kluza } - ko'e spuda fi { da'i go'i ja'e lo nu do ba rivbi cliva - da'i do cliva ja'e lo nu la oji:san ba fengu } fau lo za'i gunka ranji - T co'i platu zo'e - cusku { doi oba:san i'a.u'u mi pu xlali dalrtanuki - ia krinu lo nu mi se citka - ku'i pe'i lo nu jukpa lo stasrtanuki cu nandu lo pamei - ai.e'u mi sidju - mi ca lo nu la oji:san xruti klama cu ba'o xruti seltagji, vau oinaipei } sekai lo ka cumla - la'edi'u co'i tcica sai ko'e lo nu secu'u { je'eru'e - ki'uku i'a.ai sidju mi } gasnu lo nu lo skori cu kluza - zibo T nejni culno darxi ko'e - ce'obo ko'e morsi binxo - T ii vimcu lo skapi ko'e gi'e renro lo rectu lo jukpa tansi ja'e lo nu jicla - T gasnu lo nu lo skapi cu gacri vo'a kei gi'ebabo denpa lo nu ko'a klama

co'i lo mu'e ko'a xruti kei { doi oji:san mi fi tu'a lo dalrtanuki ba'o jukpa fe lo stasu } se cusku T noi se gacri lo ko'e skapi - ko'a { ue - a'idai do ba'o gunka ki'e }

ko'a seci'o lo ka ckire fi lo nu lo sanmi ca bredi cu cpacu lo co'i stasu tisna T pe ke'u fi'o gacri lo ko'e skapi - secu'u { za'aru'e lo rectu cu jdari - ri'abo uanai na'e citno dalrtanuki } ko'a citka ku'i lo stasu - co'i lo nu go'i so'e ri kei T to'e dasni lo skapi gi'e jarco lo vo'a jetnu tarmi - T festi cusku { uocai do citka citka - ta rectu la ba:san noi mi catra ce'o jicla vau ju'a - uunaile'o } gi'e zi cliva ca'o lo za'i ko'a jenca stali

ko'a ri'a lo dukse menli kalsa cu binxo lo ru'i nenri be lo zdani - je'u ge po'onai pu se tcica T gi ji'a cirko ko'e no'u lo selpamrai zi'e noi ca'asai citka ke'a - ca lo nu ko'a nejni claxu klaku kei lo ractu goi R cu klama - { doi oji:san - doi oji:san - ma fasnu } - ko'a fi R ciksi fe ro da - babo R secu'u { ionaicai - aicai venfu } plipe cliva

R bu'u lo cmana poi ta'e se vitke T cu lafti cpacu lo tricu jimca - T klama - { doi racton ca'o mo } - { simlu lo ka baku lo cabna nanca dunra cu lenku - semu'ibo mi lo se fagri jimca cu jaigau jmaji seva'u - e'u do ji'a ka'e ba se prali fi lo nu ba'o go'i } - semu'ibo T fi'o se kansa R go'e - baku lo jimca cu culno jmaji - seki'ubo lo remei co'a to'e cpare lo cmana - R gasnu lo nu T lidne vo'a - je vi lo se bevri pe lo T trixe ku R darxi gasnu tu'a lo fagri rinka rokci spisa tutci - sa'ei katcik - sa'ei katcik - { doi racton uanai lo katcikatcik zei sance cu mo } - R secu'u { ta zo'u la katcikatcik zei cipni pe la katcikatcik zei cmana cu sanga } tcica - babo co'i fagri loi jimca ja'e lo zu'o co'a sance - sa'ei patcip - sa'ei patcip - { doi racton uanai lo patcipatcip zei sance cu mo } - R secu'u { ta zo'u la patcipatcip zei cipni pe la patcipatcip zei cmana cu sanga } za'ure'u tcica - babo lo fagri po loi jimca co'a carmi - sa'ei box - sa'ei box - { doi racton uanai lo boxybox zei sance cu mo } - R secu'u { ta zo'u la boxybox zei cipni pe la boxybox zei cmana cu sanga } za'ure'u tcica - ku'i babo T co'a ganse lo ka glare di'o lo vo'a trixe - krixa { oiro'o oiro'o } gi'e bajra cliva

ca lo balvi djedi R zbasu lo tsaprto:garaci pexrmiso gi'e klama lo T zdani - T secu'u { doido'u ionaile'o do jaigau betri mi vau ba'anai } fengu - ku'i R fi'o flira lo xalbo cu te preti fi { tavla fi ma uanai } - T gunta simlu cusku { ca lo purci djedi bu'u la katcikatcik zei cmana do jaigau xrani mi vau oiro'oba'anai } - ku'i R spuda fi { lo ractu pe la katcikatcik zei cmana cu du lo ractu pe la katcikatcik zei cmana - na'e srana lo ractu pe la tsaprto:garaci cmana } - T secu'u { oiro'enai } se mansa - R cusku { jelca xrani xu - uu - uase'i mi casai ponse lo go'i ve mikce - i'apei gacri gasnu } - T secu'u { y - se'anai - i'a } co'i se tcica sai - R gasnu lo nu lo tsaprto:garaci pexrmiso cu gacri - lo pesxu cu cpina jinru tu'a lo jelca xrani seri'a lo nu T cortu je krixa - ca'obo R sutra cliva

ca lo balvi djedi R bu'u lo ckunrsugi cmana be vi lo T zdani cu katna lo tricu - T klama - secu'u { ua.u'ale'o do vi zvati - gau do le mabla ve mikce cu gacri mi vau oiro'ocai ba'anai } fengu - R te preti fi { tavla fi ma } - seki'ubo T ciksi tu'a lo purci djedi - R spuda fi { lo ractu pe la tsaprto:garaci cmana cu du lo ractu pe la tsaprto:garaci cmana - na'e srana lo ractu pe la ckunrsugi cmana } - T secu'u { oiro'enai } se mansa - R cusku { ta'o mi ca katna lo tricu tezu'e lo nu zbasu lo bloti - ai kalte lo finpe mu'a - aipei } - T spuda fi { pluka simlu } - R cusku { mi ki'u lo nu blabi xadni cu zbasu lo tricu bloti - do ki'u lo nu xekri xadni cu go'i lo dertu bloti vau iepei } - T tugni gi'e co'a danre zbasu fi lo dertu - bazabo R e T zo'ibu'u lo rirxe co'a finpe kalte simxu - ge lo R bloti ri'a lo tricu te zbasu cu fulta snada gi ku'i lo T bloti ri'a lo dertu te zbasu cu cfari co runta ce'o se kevna ce'o jinru - { ii aucai sidju } se krixa T - ku'i R secu'u { do catra la oba:san gi'e gasnu lo nu ri se citka la oji:san - ju'o co'i dapma janli do } na sidju gasnu - ja'ebo T mo'u jinru lo rirxe gi'e morsi binxo

fa'o
se finti la .djeims. Please report any errors to me.