Documents | Modify | Uploaded on Sat Aug 24 12:20:12 2013

lei cmalu narge .e le cmana mlatu

By la .mi,iaza,uan.kenj. e la .guskant.

bripre ni'o re mo'o
lei cmalu narge .e le cmana mlatu
sei lisri be fi la .mi,iaza,uan.kenj. .i

lo cizra pu xatra la .itciron. .i lo'u

doi .kanet.itciron. .io
de'i li so pi'e paso .i
cinmo xamgu .EU[io] .ui .i
ca lo bavlamdei ku NANTA[nandu] pajni
.i bo ko .io KLAPA[klama]
.i .e'anai lo cecla XARCU[xarci] cu KANXA[kansa]
mi'e cmana mlatu mu'o le'u

.i la .itciron. sei gleki traji
ca lo bavlamcerni ku cpare klama
fo lo cinla dargu be re'o lo fenra rirxe
.i sei klina brife
lo jesnarge tricu ku jai gau farlu fai loi narge .i

doi jesnarge tricu doi jesnarge tricu
le cmana mlatu zo'a ti na klama xu

le cmana mlatu .i'u
ca lo clira cerni ku vofli klama
fu lo xirma karce
mo'i du'a

du'a ku zo'u mi fa'a klama
.i .ia cu'i ku'i di'a klama .ai
ki'e jesnarge tricu

.i le jesnarge tricu noi smaji ku
di'a jai gau farlu fai loi narge
.i la .itciron. ze'i klama
.i ce'o bo flani jacfa'u
.i to'unai lo djacu mo'i ze'o carmi klama
pa'o lo cmalu kevna be lo blabi rokci bitmu
gi'e siclu ce'o farlu .i

doi doi flani siclu
le cmana mlatu zo'a ti na klama xu

le cmana mlatu .i'u
pu zi ku vofli klama
fu lo xirma karce
mo'i vu'a

vu'a ku zo'u mi to'o klama
.i .ia cu'i ku'i di'a klama .ai
ki'e flani siclu

.i le jacfa'u ru'i flani siclu
.i la .itciron. za'u re'u ze'i klama
.i ce'o bo ni'a lo tricnbuna
so'i blabi gumri ku cizra zgike bo se bende .i

doi gumri
le cmana mlatu zo'a ti na klama xu

le cmana mlatu .i'u
ca lo clira cerni ku vofli klama
fu lo xirma karce
mo'i ne'u

ne'u ku zo'u nenri lo va cmana
.i .ia cu'i ku'i di'a klama .ai
ki'e gumri

.i le gumri romei
sei za'a zukcfu
ru'i cizra zgike bo se bende
.i la .itciron. za'u re'u ze'i klama
.i ce'o bo
bu'u lo tricnkurumi galtu
lo ricyratcu ku tai'i .pion. plipe .i

doi ricyratcu
le cmana mlatu zo'a ti na klama xu

le cmana mlatu .i'u
ca lo pu'o cerni ku vofli klama
fu lo xirma karce
mo'i ne'u

ne'u ku zo'u reroi se cusku
.i .ia cu'i ku'i di'a klama .ai
ki'e ricyratcu

.i le ricyratcu ba'o canci
.i lo tricnkurumi galtu bo jimca ku tolcando
.ije lo lamji tricnbuna pezli ku
tai'i .tciràt. jai gusni

.i la .itciron. za'u re'u ze'i klama
gi'e cpare lo salpo
pa'o lo xekri tricnka'ia foldi
.i ce'o bo
suksa klina bo carmi
.i .ua melbi je solji srasu bo foldi
.ije cizra nanmu .i

xu do se slabu le cmana mlatu

le cmana mlatu ku .io ba zi xrukla ti
.i li'a do me la .itciron. .io

.ue go'i .i ku'i seja'e ma djuno lo du'u go'i

ru'a do tcidu le xatra pei

go'i .iseki'ubo mi ti klama

lo ra jufra zo'u juxre mutce pei

pe'i na'i lo jufra ku rauva'e xamgu za'a

lo ra lerfu ku ji'a rauva'e xamgu xu

xamgu
.i lo mumoi gradu tadni ku ji'a sai
me'iva'e xamgu ciska

lo mumoi gradu tadni zo'u
sa'unai co'a zei gradu ckule co'e pei

na go'i
.i ru'a co'u zei gradu ckule co'e

le ra xatra zo'u mi ciska ju'a

pau sai do mo

mi le cmana mlatu ku .io
xirma karce sazri selfu

.i sei brife
loi ve'u je vi'a srasu ku tolcando
.i le xirma karce sazri selfu ku rinsa fi lo zu'o jundi
.i la .itciron. carna viska
.i .ua le cmana mlatu ku tai'i .piokòt. rinsa
.i la .itciron. ji'a jundi rinsa .i

coi .i ca lo prulamdei ku nu xatra ki'e

coi fi'i sai
.i ba lo prulamlamdei ca'o pante simxu
.ije lo nu pajni ku nandu mi
.i .au pinka fi do
.i ko se frili
pu lo nu lei cmalu narge ti klama
.i fu'inai ca ro nanca ku
se nandu lo de'u nu pajni

.i le cmana mlatu ku tolsetca lo sigja .i

.e'u

.aunai

ru'a do citno

.i le cmana mlatu ku jai gau mosra lo sacki
gi'e tezu'e polje se flira
gi'e rinci vasxu lo blanu danmo
.i .ua
ne'i loi srasu ku
vi'a solji bolci so'imei .i

.ua klama
.i doi selfu
gau ko sance lo janbe
gi'e vimcu loi srasu be bu'u ta noi se gusni

.i le xirma karce sazri selfu ku jai gau bikla .i

lo nu pajni ku ca ze'u pu djedi li ci
.i e'u sai co'a pendo simxu

.ienai .ei lo stedu kinli ku traji lo ka banli
.i mi traji lo ka kinli

.ienai lo bolci ku banli
.i mi traji lo ka bolci

.ienai lo barda ku banli
.i mi traji lo ka barda
.iseni'ibo mi banli

.ienai ba'e mi do mutce zmadu lo ni barda
.i la'e di'u se cusku le pajni .io

.ienai lo rajycla ku banli
.i nu rajycla

.ienai lo catke tsali ku banli
.i lo nu catke ku jai ni'i jdice

savru dukse
.i do jinvi lo du'u ti stuzi ma paunai
.i ko smaji .i ko smaji
.i lo nu pajni ku ca ze'u pu djedi li ci
.i e'u sai co'a pendo simxu

.ienai .ei lo stedu kinli ku traji lo ka banli
.i mi traji lo ka kinli

.ienai lo bolci ku banli
.i mi traji lo ka bolci

.ienai lo barda ku banli
.i mi traji lo ka barda
.iseni'ibo mi banli

.ienai ba'e mi do mutce zmadu lo ni barda
.i la'e di'u se cusku le pajni .io

.ienai lo rajycla ku banli
.i nu rajycla

.ienai lo catke tsali ku banli
.i lo nu catke ku jai ni'i jdice

savru dukse
.i do jinvi lo du'u ti stuzi ma paunai
.i ko smaji .i ko smaji
.i lo nu pajni ku ca ze'u pu djedi li ci
.i e'u sai co'a pendo simxu

.ienai .ei lo stedu kinli ku traji lo ka banli
.i mi traji lo ka kinli

.ienai lo bolci ku banli
.i mi traji lo ka bolci

.ienai lo barda ku banli
.i mi traji lo ka barda
.iseni'ibo mi banli

.ienai ba'e mi do mutce zmadu lo ni barda
.i la'e di'u se cusku le pajni .io

.ienai lo rajycla ku banli
.i nu rajycla

.ienai lo catke tsali ku banli
.i lo nu catke ku jai ni'i jdice

savru dukse
.i do jinvi lo du'u ti stuzi ma paunai
.i ko smaji .i ko smaji
.i za'adai mi .ei mo pei

.e'u xusra lo du'u
lo traji be lo ka bebna ku
.e lo ka kalsa ku
.e lo ka cunso ku
ku traji lo ka banli
.i mi se ctuca fi la'e di'u

.i'e
.i ko smaji
.i xusra
.i lo traji be lo ka to'e banli ku
.e lo ka bebna ku
.e lo ka kalsa ku
.e lo ka cunso ku
.e lo ka stedu korcu ku
ku traji lo ka banli

.i lei cmalu narge co'a smaji je dunja pe'a .i

ki'e sai .io
.i ze'i lo mentu be li papimu ku
galfi .io ti poi nandu carmi nu pajni ku'o lo mulno
.i .e'o ba ji'a ku do se xatra
nagi'a klama ti
.i mi roroi ckire dunda da do

je'e .i lo nu ckire dunda ku na se nitcu

.e'o do te dunda ki'u tu'a lo mi ka jgira
.i ba xatra la'e lu .kanet.itciron. .io li'u
ti po'u la'e lu pajni stuzi li'u .e'apei

.e'a

.i le cmana mlatu ku ze'a ku
sei djica za'a be lo nu za'u re'u tavla se'u
jai gau sarlu fai lo flira kerfa
gi'e jai gau slilu fai lo kanla gacri .i

ji'a lo jufra pe lo xatra zo'u
ba ciska lu
da cuntu
.iseki'ubo ca lo bavlamdei ko stedu tolcanci
li'u pei

pe'i cizra .e'unai

.ie lo jufra gau stali .ai
.i lo nu ckire dunda zo'u do se xamgu
lo solji cmalu bo narge
ji lo silna finpe stedu

.enai

.i le cmana mlatu ku za'a co'u xanka .i

doi selfu
ko sutra bevri lei cmalu narge poi litce li pa
.i ganai claxu
gi ko mixre jmina loi cinta ke cmalu narge
.i ko sutra

.i le xirma karce sazri selfu ku
jai gau vasru fai lo merli baktu
loi de'u cmalu narge .i

sa'e litce li pa

je'e .i ko jai gau bredi fai lo xirma karce

.i lo blabi ke barda gumri ke xirma karce ku
se lacpu je tolcanci
.i za'a lo di'u xirma ku grusi je cizra be fi lo tarmi .i

.ai co'a kansa klama lo do zdani

.i ca lo nu lo xirma karce ca'o klama kei
lei cmalu narge ku ru'i jdika lo ka gusni
.i ca lo nu lo xirma karce co'u klama kei
lei cmalu narge ku ba'o binxo lo fadni bunre
.i ji'a lo drata ku canci
.ije la .itciron. ca'o sanli ca'u lo vo'a zdani
fi'o se jgari lo merli baktu be lei cmalu narge
.i na'e ba se xatra tu'a lu mi'e cmana mlatu mu'o li'u
.i baku la .itciron. so'o roi jinvi lo du'u
.u'u vo'a pu .ei curmi lo nu ciska
lu ko stedu tolcanci li'u

fe'o
se finti la .djeims. Please report any errors to me.