Documents | Modify | Uploaded on Sun Aug 25 22:11:54 2013

mi .io mlatu

By 夏目漱石 (natsumen.sousekin), tijlan

mi .io mlatu
pa mo'o

ni'o
mi .io mlatu
.i nu'o se cmene
.i pu vi ma kau jbena
sei na sai te sidbo
.i ge'e [ mi ] pu va'o lo mlimanku je cilmo
cu sa'ei .nian.nian. krixa sei po'o [ mi ] morji
.i mi .io bu'u ra pa re'u
viska lo me lo remna moi
.i ji'a ve du'o lo balvi
ra
me lo tadypre
noi cicprije traji ke remna jutsi
.i lo dei me lo tadypre
so'o roi ku
mi'a [ noi mlatu ]
kalte ce'o jicla ce'o citka
vau ti'e
.i ku'i ca ra
[ mi ] na djuno zo'e [ ty ] ja'e
lo nu [ mi ] na ku sai zei terpa
.i po'o [ mi ] ca lo nu [ mi ] gau [ ty ] cpana lo ty xanloi gi'e mo'i ga'u se lafti kei
cu ka ge'e fulflu kei cinmo
.i lo nu [ mi ] ga'u lo [ ty ] xanloi cu milxe cnisma viska lo ty flira
cu ka'u me lo viska be lo remna ku cfamokca
vau pe'i
.i da poi ca ku [ mi ] cizra cinmo [ ke'a ty ]
cu nau za'o stali [ tu'a mi ]
.i ra'u
lo noi kerfa se jadni .ei ka'u ku'o flira
cu xulxutla tai lo patxu
.i [ mi ] ba penmi so'i mlatu .i je ku'i
no roi go'i lo dei tai nalpa'e [ no'u ty ]
.i ji'a lo [ ty ] flira midju
cu dukse punli
.i je ra'i lo ri kevna
[ ty ] so'o roi tai'i .puxpux. danmo vasxu
.i .oi tai vaxnandu .e'e nai sai
.i lo du'u ra me lo sigja moi noi lo remna cu vasxu zo'u
[ mi ] co'i la'e di'u facki
[ mi ] va'o lo dei tadypre xanloi ze'a kufra zutse
.i ba bo ku'i [ lo vanbi ] co'a nilsutra mutce carmu'u
.i ty ji kau mi po'o ca muvdu sei na djuno
fau lo nu dukse vincarna
.i .oi ro'o
.i sei si'o ka'e nai sai renvi se'u
ge zoi dosar. sance gi [ mi zo'u ] sanji kalsa [ ri'a lo nu lo mi stedu cu janli lo loldi ]
[ to ] .i da pe co'u la'e di'u jo'a se morji [ mi ]
.i je ku'i lo .ua nai drata ta'i lo kampensi traji na go'i [ toi ]
.i co'i ku .ua
ty na zvati
.i lo so'i mei be pu tunba zo'u
[ mi ] na sai viska su'o da
.i lo ji'a vajni mamta
ba'o canci
.i ji'a du'i nai lo pu vanbi
cu za'i dukse gusni
.i go'i fau lo nu [ mi ] ka'e nai kanla kalri
.i sei .ua nai si'o za'i cizra se'u
[ mi ] co'a masno parkla
ja'e lo nu mutce cortu
.i mi .io to'o lu'o lo sudyxri cpana
zi fa'a lo tumrsasa nenri
ba'o se fesre'o
.i sei mu'e parkla fu'i nai to'o lo tumrsasa se'u
va barda lalxu
.i mi .io ca'u ly zutse gi'e
pensi lo du'u ma kau ka'e tadji [ tu'a mi ]
.i ge'e na pruce fi lo jo'a zei seljdi
.i za bo
[ mi ] te sidbo lo nu ganai [ mi ] krixa gi ty xruti
.i [ mi ] sa'ei .nian.nian. troci
.i ku'i no zo'e klama
.i za bo ga'u lo lalxu cu sance flecu brife .i je
djedi fambi'o ca'o
.i [ mi ] co'a mutce xagji
.i krixa .au ge ku'i na voksa kakne
.i sei na zifre se'u
[ mi ] si'o fe'e co'u lo .e'i nai cidja stuzi cu cadzu kei jdice gi'e
co'a snosno klama ru'u lo lalxu mo'i zu'a
.i .oi ro'o sai
.i [ mi ] se ci'o ku'i revytoi gi'e
bapli klama
.i ja'e sai bo remna simlu stuzi
.i sei si'o da'i ga nai nerkla ti gi xamgu se'u
[ mi ] pa'o lo bambzybi'u selspo kevna
cu tonkla mo'i ne'i lo bi'u remzda
.i sei dimci'e .u'e se'u
ga nai da'i lo dei bambzybi'u na selspo gi
la'a ju'a mi .io bu'u lo dagmla cu xagjymro
.i .i'e ro'e zo pavricti'o [ noi va'o lo sni'ono bangu cu se smuni lo si'o lo nu va'o lo nu solri ja sicpi kei da rivbi klama mo'i ni'a pa tricu poi bu'u ke'a penmi de cu sinxa lo ka da ce de steci dimna simxu ku'o ]
.i lo dei spabi'u kevna
pu ca
te pi'o lo nu mi .io vitke lo lamzda se pe la cibykre [ noi lo kerfa be ke'a cu skari ci da ]
cu pluja
.i bi'u
[ mi ] mipkla lo remzda gi'e ku'i
co'a gasnu ma .ua nai
.i ba'a manbi'o
gi'e xagji
gi'e lenku
gi'e co'a sicpi .uo .oi
.i .ei na xaksu lo temci
.i sei na zifre se'u
[ mi ] fa'a lo .e'i nai tolmanku je glare simlu
cu cadzu
[ to ] .i ba'a nai ro'e [ mi ] ca'o ku ba'o sai nenri lo zdani [ toi ]
.i bu'u ku mi .io snuti je krefu penmi lo na'e bo lo de'u tadypre remna
.i pa moi se penmi fa lo djuni'u [ goi lo selfu be lo se zdani ]
.i ri se mau sai lo de'u tadypre cu vlile
fau lo nu zi lo nu viska mi .io
jgari lo [ mi ] nebyti'e gi'e
renro [ mi ] fa'a lo bartu
.i [ mi ] se ci'o lo ka .a'o nai fanmo [ sei morsi ]
cu kanla ga'orgau gi'e
lacri le tsani lo dimna
.i ku'i .e'e nai [ mi ] ka'e nai renvi lo nu xagji je lenku
.i mi .io sei krefu
se ga'a lo dy nunjudyfli
fa'a lo jupku'a
cu parkla
.i zi bo mi'u [ mi ] gau se renro to'o
.i mi .io fau lo nu se renro ce'o parkla ce'o se renro ce'o parkla kei
lo mintu li vo ja mu jai krefu
sei morji
.i [ ba'a nai ] co'i ku [ mi ] fe lo me lo djuni'u co'a tolnei be'u nai
[ to ] .i nau za pu ku [ mi ] se gau lo nu lebna lo dy fiprsanma cu venfu se ri'a
lo nu co'u sai steba [ toi ]
.i pu'o lo ro moi nu mi .io gau se degre'o kei
lo dei zdani ralpre
secu'u { savru .oi .i mo }
mo'i to'o klama
.i dy se gau lo nu mi .io dandu gi'e se farna ry kei
{ lo ti zdacau vermlatu zo'u
ro roi lo nu [ mi ] bargau cu parkla lo jupku'a vau .oi }
cusku
.i ry sei zu'o fe lo pe ni'a lo nazbi ge'u xekri kerfa cu tongau se'u
ze'a zgana lo mi .io flira
.i za bo se cu'u { ki'u ku .i'a ralte ne'i }
to'o bancu klama
.i za'a ry me lo nalcafne bacru
.i dy tai lo steba mi .io fa'a lo jupku'a cu renro
.i se ja'e ku
mi .io co'i jdice lo du'u lo dei zdani cu mibmoi zdani

ni'o
lo mi .io ralpre so'u sai roi penmi mi .io
.i ti'e [ ry ] se jibri lo nu ctuca
.i [ ry ] fi'o ve xruti lo ckule
cu su'a djemu'o nenri lo ckuku'a fau nai lo nu barkla
.i fi'o krici lo se zdani [ ry ] cu mutce tadytoi
.i lo te krici cu go'i simlu zukte
.i ku'i je'u
[ ry ] na me lo tadytoi be cu'u lo se zdani
.i mi .io so'o roi
ta'i lo smaji
lo ry ckuku'a cu mipcta
.i ry pi so'i roi sipcando
.i [ ry ] pi so'o roi fa'a ga'u lo se de'a zei tcidu cukta cu falgau lo molselcigla
.i ry cantyble
fau lo nu lo skapi cu skari lo kadypelxu gi'e
jarco lo ka ge nai jdari gi nai jmive
.i to'e ja'e nai bo
[ ry ] citka lo mutce
.i ba lo nu go'i
cu pinxe la takadiastaz. [ no'u lo canti velmikce ]
.i ba lo nu go'i
cu kalri lo cukta
.i se la'u li re ja ci tcidu ja'e lo nu [ vo'a ] sipydji
.i falgau lo molselcigla fa'a ga'u lo cukta
.i la'e di'u
me lo ry rolnicte krefu tcaci
.i mi .io noi mlatu ku'i
cu so'o roi pensi
.i bo lo nu ce'u ctuca zo'u frili je'u
.i ga nai da'i remna jbena gi .e'u se'i sai binxo lo ctuca
.i ga nai fau lo tai nu sipna cu snada gi .ei kakne fa lo ji'a mlatu
.i ku'i du'o ry
no da dunli lo nu ctuca kei lo ka raktu
fau lo nu ry ca lo pendo cu vitke cu patsku zo'e .a zo'e

ni'o
ca lo nu mi .io co'a xabju lo dei zdani kei
na'e bo ry mutce nalxe'o
.i se ka'a ro zo'e
[ mi ] se fanta
gi'e na se jundi vau [ na'e bo ry ]
.i lo du'u [ mi ] tai ma kau na se dibzga
cu se jarco lo mu'a nu [ mi ] ze'e ca nu'o se cmene
.i mi .io sei na zifre
cu troci lo nu jibni ry noi ba'o nercru mi .io
.i ca lo cerni noi ry tcidu lo nuzykarni ku'o
[ mi ] ro roi cpana lo ry galtu'e
.i ca lo nu ry sipcando kei
[ mi ] ro roi cpana lo ry rixcutne
.i la'e di'u zo'u
ge nai sa'e [ mi ] nelci ry gi
lo nu no da kurji [ mi ] cu bapli
.i ba ku
[ mi ] se ri'i lo vrici
cu jdice lo du'u sipna nu'i ga'u lo risyvau ca lo cerni nu'u pe'e je lo jubrkotatsu ca lo nicte nu'u pe'e je lo korlu'a ca lo tcima xamgu donri
[ = cu jdice lo du'u sipna nu'i ga'u lo risyvau ca lo cerni nu'u pe'e je lo jubrkotatsu ca lo nicte nu'u pe'e je lo korlu'a ca lo tcima xamgu donri ]
.i zu'u nai pluka [ be mi ] traji fa
lo nu ca lo nicte cu klama mo'i ne'i lo lo bu'u verba ku ckana gi'e simxu sipna
.i lo dei verba cu nanca li mu fa'u ci
.i je ca lo nicte
lo re mei
cu nerkla pa kumfa fe pa ckana gi'e sipna
.i mi .io ro roi
di'o lo vy midju
cu fakyvi'a lo canlu poi mi ka'e nenri ke'a
gi'e sezyse'a ta'i zo'e .a zo'e .i ku'i
ga nai sei xlafunca pa vy cikybi'o gi
malfasnu
.i vy to ra'u lo cmalu cu malckaji toi
se cu'u { mo'i ne'i mlatu .i mo'i ne'i mlatu }
fau lo nu nicte ja bu'a kei
co'a cladu voksa klaku
.i ba bo
lo bi'u nai nircantyble ralpre
ro roi cikybi'o .i je
to'o lo kumfa noi lamji cu klama
.i je'u nau za pu ku
[ vy ] [ ry ] fi lo ci'urga'a lo zargu cu se ke jursa darxi

ni'o
mi .io fi'o se fancu lo nu kanxa'u zgana lo remna kei
co'a se tcaci lo nu birti lo du'u ra cu sezyse'u
.i ra'u lo verba noi mi .io [ ce ke'a ] sipsi'u zo'u ja'a sai go'i
.i [ vy ] sei sevzi selfu se'u
fe zo'e [ no'u mi ] fatydadgau .i ja
fa'a lo [ mi ] stedu cu gairgau lo pledakli .i ja
baryre'o .i ja
fa'a lo toknu [ fe mi ] cu nerca'e
.i ji'a sai
ga nai mi .io milxe do'a fapro
gi lo selzda gau lo culno
cu jersi ce'o xrani [ mi ]
.i nau za pu ku [ mi ] ge'e di'o lo xrimatci cu jgalu rakygau se ri'a
lo nu lo nimspe cu mutce fengu gi'e
ja'e bo co'u frili nercru [ tu'a mi ] fa'a lo xrimatcyku'a
.i fau lo ku'i nu vi lo jupku'a jubme [ noi lenku va'o ke'a ] zo'e [ no'u mi ] cu desku kei
[ lo selzda ] za'o sai norxanka
.i lo sa'olragve [ be lo dargu ] se pe la blabi noi mi .io sinma ku'o
ro roi lo nu penmi [ mi ]
cu cusku .io lo se du'u no da dunli lo remna lo ka nalkecti
.i la blabi ca lo purdei
cu se jbena vo da pe tai le bolci [ sei melbi ]
.i ku'i lo [ bi'u ] ta zdani tadypre
ca lo ci moi djedi
cu bevri ra lo trixe lalxu
gi'e pujli'a ro vo da vau ti'e
.i la blabi cu klaku tavla fi pi ro di'u
se cu'u lo se du'u lo nu mi'o noi mlatu jutsi cu ru'i mulgau lo ka rirni prami gi'e lifri lo nu melbi lanzu tarmi cu se sarcu lo nu damba je daspo lo remna
.i pe'i mulno jetnu
.i ji'a lo lamzda se pe la cibykre
se cu'u lo se du'u lo remna cu na jimpe tu'a lo ponsyki'u [ no'u la'o gy. possessive right .gy ] kei
ca mutce fengu
.i sei jinzi
ma'i mi'a no'u lo ki'igri
fai lo djarmezaci stedu .a lo fiprbora befke'a
da poi clira traji fakcta cu jai se ki'u citka ra vau ka'u
.i ga nai da'i de la'e di'u na tinbe gi curmi lo nu [ da ] pilno lo tsabai
.i ja'o ko'a goi lo remna na sai te sidbo la'e di'u
fau lo nu [ ko'a ] ro roi se va'u ko'a vilyle'a lo poi mi'a fakcta ku'o cidja
.i ko'a se pi'o lo ko'a tsabai
lo ki'u cidja be mi'a
cu lebna je norzungi
.i la blabi cu xabju tu'a lo jempre .i je
la cibykre cu se kurji lo daurka'ipre
.i mi .io xabju tu'a lo ctupre ge'e
.i se ga'a la'e di'u [ mi ] zmadu lo re mei lo ka selfrili
.i ju'a ga nai po'o de'i ro da mivyfri snada gi no'e raktu
.i do'a nai lo remna ba bapyza'i vitno na ku .ia
.i ge'e .e'u se'i surla denpa lo mlatu cedra

ni'o
sei fi lo ka sezyse'u cu morji
[ mi ] tavla .ai fi lo nu lo mi .io ralpre cu fliba ri'a ra
.i sei jinzi lo dei ralpre na do'a se mau kakne zo'e
gi'e ku'i ta'e na'e rinju gaudji zo'e
.i mu'a jai gau pemrxaiku gi'e terxa'a la xototogis. [ no'u lo sni'ono pemci karni ] .i
mu'a go'i lo me le nintaipemci la miojon [ no'u lo sni'ono pemci karni ] .i
mu'a ciska lo srera culno gliju'a .i
mu'a ca ku ci'irju'i lo laprertci gi'a tadni lo nunsanga gi'a ji'a sa'ei .vuv.vuv. snari'a lo violni
.i ku'i .uu
ro la'e di'u na me lo selsnada
.i ji'a [ ry ] ga nai jai cfari gi to'e ri'a nai lo nu cantyble cu junri .u'e
.i [ ry ] ne'i lo maslumku'a cu sanga ja'e
lo nu va'o loi jbixa'u cu se cmene la maslumku'a ctuca
.i to'e se mu'i nai bo [ ry ] ru'i norxanka
.i .ia .ue nai la'e di'u cu krefu lo nu me la taira,no,munemoris.
.i fau bo ro zo'e se du'u me la munemoris. kei cmila
.i sei du'u lo dei ralpre co'i jinvi ma kau se'u
de'i lo pe za pa masti ce'e ba lo nu mi .io co'a xabju ge'u ma'irnunjerna
[ ry ] fi'o se dadjai lo barda dakli
cu tolsma xruti
.i sei si'o [ ry ] ba'o terve'u ma kau se'u
lo jacycinta .e lo krepenbi .e lo pelji be me'e zoi zoi .uatman. zoi
.i co'a lo cabdei
[ ry ] co'u jai selsanga ja pemrxaiku
gi'e te pixra sei simlu
.i ja'e bo co'a lo bavlamdei ce'e ze'a
de'i zo'e .e zo'e
[ ry ] bu'u lo ckuku'a se cau lo nu sipcando
cu te pixra po'o
.i ku'i ge zgana lo te go'i gi
no zo'e ka'e jimpe lo du'u [ ra ] pixra ma kau
.i sei za'a nu lo ji'a go'a lo du'u na xamgu cu jinvi se'u
de'i zo'e
ca lo nu da poi pendo ry gi'e tadni lo melske cu klama kei
[ mi ] tirna lo nu [ ry joi my ] tavla no'u la'e di'e
.i { ge'e lo nu xamgu terxra cu nandu
.i se ga'a lo me lo drata cu frili simlu vau ku'i .i
gau lo mibdza [ no'u mi ] ku jo'u lo penbi cu co'a nandu simlu ba'a cu'i }
.i di'u me ry pinka
.i .ie na jitfa
.i lo ry pendo fau lo nu pa'o lo solji greku kalminle'o cu catlu lo ry flira kei
{ ju'a na ku co'a lo cfari ka'e tai certu terxra
.i ra'u cu'i na ku ta'i lo po'o kumne'i xanri ka'e terxra
.i pu ku
la .andreas.del.sartos. noi iltalia balpre cu cusku
.i { ga nai do djica lo nu terxra gi ko mirgau le rarna sa'e
.i sei tsani cu tarmo'a
.i sei terdi cu ruldirgo
.i sei vofli cu cipni
.i sei bajra cu floda'u
.i sei lalxu cu slofi'e
.i sei sudytricu cu ko'orvu
.i le rarna zo'u kuspe be la'e di'u banli jmive pixra }
.i pe'i pei
do ji'a zo'u fau lo nu [ do ] terxra be zu'i djica kei [ ko ] te vinxra .e'u }
.i { ro'e
la .andreas.del.sartos. lo tai bu'a pu cusku vau .ua
.i na sai djuno
.i .ie ro'e jetnu
.i je'u drani }
.i ry mutce manci
.i ti'a lo [ bi'u nai ] slogreku
lo ckasu nuncmila cu se viska

ni'o
ca lo bavlamdei
mi .io tai lo fadni
vi lo korlu'a cu kufra sipcando .i ca bo
lo ralpre tai nai lo fadni cu barkla lo ckuku'a gi'e ru'i gasnu zo'e ti'a mi .io
.i sei ge'e [ mi ] cikna binxo cu zgana lo nu [ ry ] ca'o gasnu ma kau ta'i lo so'u si'e kalri kanla
.i ry jurclu zukte tu'a la .andreas.del.sartos.
.i mi .io se ga'a la'e di'u bai fliba lo nu na casmi'a
.i bo ry mu'i lo nu pu te stidi lo ry pendo
cu sei pa moi se'u te vinxra mi .io vau .ua
.i mi .io ba'o rau si'e sipna
.i [ je ] .au sai plova'u
.i ku'i pa'e ry noi junri ke penbi gasnu cu se kecti [ mi ] lo nu [ mi ] muvdu .i se ki'u bo
[ mi ] .a'i smaji renvi
.i ry ca ba'o terxra lo mi .io tamkoi gi'e
ca'o skajmina di'o lo [ mi ] flira [ pixra ]
.i mi .io sacysku .ai
.i mi .io fo lo'i mlatu na sai tarmi traji
.i lo kamcla mu'a lo kamkre mu'a lo kamflira mu'a zo'u
[ mi ] na sai darsi jinvi lo du'u [ mi ] zmadu lo drata mlatu
.i ku'i fau lo do'a nu mi .io tai nalmle kei
[ mi ] ka'e nai sai jinvi lo du'u [ mi ] me lo cizra tarmi poi ca se terxra ry
.i ra'u skari frica
.i mi .io cu skari lo kadgrusi joi pelxu tai lo fa'arsi mlatu gi'e se sefta lo barna morna tai lo larnxurci
.i la'e di'u do'a nai ga'a ro zo'e senpi claxu jetnu ju'a
.i ku'i ca fau lo nu [ mi ] viska lo ry nunskajmina kei
ge nai pelxu gi nai xekri
.i ge nai grusi gi nai xunbu'e
.i ji'a na me lo mixre be la'e di'u
.i me lo skari be pa po'o klesi vau ju'a .e'i
.i ji'a sei cizra
[ lo pixra be mi ] cu kanla claxu
.i pa'e ro'e ti me lo se vinxra pe ca'o lo nu [ mi ] sipna .i je ku'i
lo ji'a sai kanla simlu diklo ka'e nai se viska se ri'a
lo nu ka'e nai jimpe lo du'u [ lo se pixra cu ] me lo kalcau je'i kau sipna mlatu
.i mi .io sivni jinvi lo du'u se gu tai me la .andreas.del.sartos. gi tai na kakne .a'o nai
.i ku'i lo [ ry ] ka [ ce'u ] junri cu .ei se manci
.i da'i .ai va'o lo cumki [ mi ] na muvdu se va'u [ ry ]
.i ku'i za pu co'a pinca bapli
.i lo xadne'i sluji cu sebdesku
.i ro mai [ mi ] co'u so'u si'e kakne seri'a
lo nu bai cliva
fau lo zu'o tengau sai ro re tuple mo'i ca'u .e lo cnebo mo'i ni'a gi'e
sa'ei .aaax. barda plova'u
.i fau ku lo nu [ mi ] stali cu co'u vamji
.i .a'e cu'i
lo ry selkanpe gau [ mi ] ba'o spofu .i se ki'u bo
.ai [ mi ] ca klama lo trixe gi'e mulgau [ sei vikmi ] kei
sei pensi je ze'o klama
.i ba bo ry fi'o voksa lo za'a kampa'acri joi kamfengu
to'o lo zdani nenri
cu krixa { doi malbebna }
.i ry ro roi lo nu gutsku cu ta'e pilno zo malbebna
.i pa'e .o'o [ ry ] na selsau lo drata se gutsku
.i ku'i lo nu se du'o nai tu'a lo pu ca norpatytoi cu dukse cusku zo malbebna cu jai tolclite pe'i
.i bo ga nai ta'e ku ca lo nu mi .io cpana lo ry trixe [ ry ] cu da'i frati lo xamgu flira gi
lo di'u dusygutsku zo'u [ mi ] na pante
.i ku'i ge no roi gasnu lo xamgu be mi gi ku'i
lo nu [ zo'e no'u mi ] pinca cliva [ fi ry ] cu se pinka zo malbebna vau .i'e nai sai
.i lo remna zo'u sei jinzi ro zo'e se mansa lo sevzi kamvli gi'e zenfarvi
.i ge'e ga nai na ku lo vlimau be lo remna cu klama gi'e sfasa gi
ba'a se la'u ma kau zenfarvi [ .ii .oi ]

ni'o
lo ka sezyse'u pe tai la'e di'u zo'u [ mi ] norpatytoi .ai
.i ku'i mi .io ra'a lo remna nu nalvu'e ku
lo sospi'imau be la'e di'u kambadri pu ve nuzba
.i ti'a lo mi .io zdani cu kramrtsubo be li pa no tcatycange
.i barda na gi'e ku'i
sapcnici
stuzi lo nu kufra se gusni tu'a lo solri
.i ca lo nu ga lo zdani verba cu jai savru to'e se ri'a lo nu [ mi ] sipcando gi
na'e selxajmi nalgleki kei
mi .io na'o ro roi klama ti gi'e cpacu lo ka panpi pruxi
.i ca lo glacritydei pe ti'u li re zo'u
mi .io ba lo nu dorcti gi'e kufra sipna kei
pa'a lo nu muvdu kei
lo ti tcatycange cu dzukla
.i fau lo nu sumne lo tcati tricu genja
[ mi ] cu klama lo vu'a bimrsugi
.i bo lo poi marxa cpana lo sudga krisnatemu ku'o barda mlatu cu ca'o farnalkli [ sei lo farna be lo stedu cu na'e frili se viska ] sipna
.i by my fau lo nu mi .io jbikla cu na sai cikna
.i ga nai [ by my ] cikna gi ru'i naljundi [ mi ] fau lo nu [ by my ] cladu sipcmo gi'e ve'u xadni preja
.i sei du'u xu kau va'o lo nu lo nalsau mo'i ne'i lo purdi cu klama cu ru'i norxanka sipna kakne se'u
mi .io bai sivni se manci lo [ by my ] tai ka darsi
.i by my curve xekri mlatu
.i lo pe ba zi lo dormidju ge'u solri
cu klina te gusni lo by my sefta
sei ka da'i ra'i lo gusycai rankre jbini cu na'e selvi'a fagri jetce
.i by my lo ka raitru ro mlatu kei banli cu xadni se tarmi
.i ju'o sai [ lo by my xadni ] pi'izma tu'a mi .io
.i mi .io va'o lo ka macysi'a je cinri cu zukcau sa'ista gi'e
pesycau zgana
.i ca bo lo smaji glacritu brife
lo pe ra'i ga'u lo bimrsugi ge'u firmiana jimca
cu milxe desygau se ri'a
lo nu sa'ei .sepl.sepl. su'o pezli lo sudga krisnatemu cu farlu
.i le raitru [ no'u by my ] sei suksa lo vo'a cukla sai kanla cu kargau
.i [ mi ] nau za'o morji
.i lo [ by my ] kanla se mau sai lo poi lo remna cu kirdirba ku'o dujricyblu cu melbi selgu'i
.i by my na muvdu
.i [ by my ] fe lo pe tai lo nu ra'i lo relkanla condi cu se renro ge'u gusni
lo mi .io tcecma mebri cu jai gau lenjo .i je
cusku { do mo le'o }
.i [ mi ] jinvi lo du'u se ma'i lo ka raltru kei [ di'u ] tolno'i ge'e selsku
.i ku'i ge'e ki'u lo nu lo [ by my ] dizlo voksa cu ckaji lo fanta be lo gerku be'o bapli kei
mi .io milxe terpa
.i ku'i ga nai [ mi ] na rinsa gi ckape [ mi ] sei [ mi ] pensi
.i se ki'u bo [ mi ] spusku { mi .io mlatu .i nu'o se cmene } se zu'e lo .a'i norxanka je norxalni
.i ku'i ca la'e di'u lo mi .io risna
cu je'u carmi rildu'e se mau lo fadni
.i by my ta'i lo su'u [ ce'u ] mutce tolsi'a kei
{ ge'e mlatu pau le'o
.i lo mlatu jai ga'a bebna ga'i [ sei su'u lo nu la'e mi krici cusku lo se du'u ri mlatu cu bebna ga'a je ma'i by my noi du'o ri ke'a cu curve mlatu ]
.i .ua nai le'o xabju ma }
sei [ by my ] je'a sai fazyzu'e
.i { mi .io lo vi ctupre zdani cu go'i }
.i { .ue nai .e'e se'a
.i [ do ] tai cinla [ sei tolplana ] za'a le'o }
sei ki'u le ka raltru
cu jgisku
.i se ga'a lo ka selsku [ ce'u ] kei
[ by my ] simlu lo ka na'e nolzda mlatu
.i ku'i se ga'a lo ka [ ce'u ] rasyclu plana kei
[ by my ] simlu lo ka xamgu citka gi'e xamgu xabju
.i mi .io { ge'e do pe tai ra cu mo } bai [ lo nu la'e di'u cinri mi ] reisku
.i { mi .o'a du la lo ma'erzai ku xekri ga'i }
sei jgira culno
.i la lo ma'erzai ku xekri cu du lo poi mi'i ve'a ku ro zo'e djuno ku'o vlile mlatu
.i ku'i [ xy ] ki'u lo nu ma'erzai kei
tsali po'o gi'e
na sai selctu
se ki'u lo nu [ xy ] se jikca so'u zo'e
.i [ xy ] me lo ka saxnu'e je darzu'e kei selju'i [ be lo terpa be xy ]
.i mi .io ge co'i lo nu tirna lo xy cmene cu milxe xanka
gi ca bo zu'u nai milxe tolsi'a ji'a [ xy ]
.i mi .io pa mai
te zu'e lo nu cipra lo ni xy nalju'o kei
reisku la'e di'e
.i { .ua nai lo ma'erzaipre ji lo ctupre cu prije zmadu }
.i { lo ma'erzaipre se mau tsali ju'o sai .o'a
.i lo do ga'i zdani ralpre zo'u tai bongu jo'u skapi vau .io nai }
.i { do ji'a ki'u lo ka ma'erzai mlatu cu .ia je'a sai tsali
.i va'o lo ma'erzai ka'e xamgu citka vau pe'i }
.i { fu'i .e'e mi .o'a va'o ro gugde da'i na claxu lo cidja vau ju'o
.i do ga'i zo'u [ ko ] ge .e'o nai ru'i carkla lo tcatycange gi .e'u kansa mi .o'a
.i ze'i me'i pa masti
[ do ] ka'e macfrica plana binxo }
.i { ba'a .a'o
.i ku'i lo mibzda zo'u lo ctupre se mau lo ma'erzaipre lo barda cu xabju vau za'a }
.i { .oi le'o sai lo da'i nu lo zdani cu se la'u ro da barda cu na rinka lo nu cidja kufra }
.i xy noi za'a co'i mutce fengu ku'o
fi'o desku lo se guska sparbambzu [ sei me la'o gy. bamboo .gy ] simlu kerlo
cu vlile cliva
.i mi .io ce la lo ma'erzaipre ku xekri cu junsi'u co'a la'e di'u

ni'o
ba ku
mi .io so'o roi
nutpe'i la xekri
.i ro roi lo nu go'i kei xy tai lo me lo ma'erzai cu jgisku
.i lo de'u tirna be fa mi ke nalmarde cuntu zo'u je'u [ mi .io ] pu te cusku xy
de'i ku
tai lo fadni
mi .io jo'u la xekri
va'o lo glare tcatycange
cu lolvre
casnu lo vrici
.i xy lo na'o se jgiski
ta'i lo ka [ ri ] cnino
cu refgau
gi'e ba bo
reisku la'e di'e mi .io
.i { do ga'i
pu ca ku
xo ratcu
cu kalte }
.i lo selju'o zo'u
[ mi ] se mau xy
mutce banro .ia
.i je
lo kamtsali .e lo kamvirnu zo'u
[ mi ] ka'e nai sai jivna xy
sei [ mi ] ca'a sanji
.i to'e ja'e nai bo
lo nu [ mi ] ve preti ra
cu sai na xamgu tcini
.i ku'i
lo fatci cu fatci .i je
[ mi ] na .ei jifsku
.i se ki'u bo
mi .io { je'u
kalte .ai .ai
gi'e nu'o kalte }
spusku
.i xy fi'o carmi desku lo noi ra'i lo xy nazbi jipno cu trati ku'o clani molkre
cu mutce cmila
.i sei jinzi xy
pa'a lo nu jgiski kei
ge'e claxu zo'e .i je
ta'i lo zu'o ka manci lo xy jgisku kei galxysnagau tinju'i [ ce'u ]
cu sai se jitro frili mlatu [ fa xy ]
.i mi .io co'a lo nu jikca xy kei
zi cilre tu'a lo dei tadji
.i va'o la'e di'u ji'a
lo nu sei sretoi cu sevzi bandu gi'e xlari'a lo tcini cu selbebna ju'o
.i lo nu sei darsi cu tavgau xy lo sevzi vudyselzu'e gi'e tcini renvi
cu xagrai
sei pespla jdice
.i se ki'u bo
sei smamli
{ do zo'u tai na'afri
se ni'i lo nu mutce kalte vau .ia }
sei .a'a [ mi ] trisku
.i .ue nai
xy pa'o le [ pe'a ] bitmu kevna cu ca'esku
.i { sei na'e mutce
[ mi ] cu kalte vei su'o ci ja vo no .ia }
du lo xy jgira te spuda
.i xy jai ranji se cu'u
{ vei pa ja re no no ratcu zo'u
zu'e lo pa mei [ no'u mi ]
ro roi gasnu .i ku'i
lo mustlei zo'u
[ mi ] na kakne le'o
.i [ mi ] pa roi klama lo mustlei ja'e
lo nu xlafri }
.i { .a'u ro'e }
sei [ mi ] tugzu'e
.i xy bikygau lo [ xy ] barda kanla gi'e cusku
{ [ la'e di'e ] cabna lo purlamna'a branunlu'i [ be ku'u lo sni'ono ]
.i lo mibzda ralpre fi'o se jgari lo rokpu'o dakli
cu nerkla lo korlu'a cnita .i ba bo
doi do'u
lo barda mustlei le'o
cu se jenca
barkla
sei [ mi ] zgana }
.i { .a'u }
sei [ mi ] se cinri tigni
.i { lo mustlei zo'u
milxe zmadu be lo ratcu be'o barda vau ju'a
.i se ci'o la'e { le'o sai }
[ mi ] jersi gi'e
co'i kavbu fi lo vimjaclu'a nenri
sei [ mi ] zgana }
.i { .i'o }
sei [ mi ] zarsku
.i { ku'i doi do'u
co'i lo vajni
my le'o fanmo vimgapci terje'e .oi sai
.i rigni rigni panci .oi
.i co'a ku
[ mi ] ga nai viska lo mustlei gi se rigni }
.i xy ca lo ku'i cabna
tai lo da'i nu za'o sumne lo purlamna'a rigni kei
lafti lo birka gi'e
so'o roi satre vi'a lo nazbi jipno
.i do'a mi .io milxe kecti [ xy ]
.i sei ge'e [ mi ] gekri'a djica
{ ku'i lo ratcu zo'u ga nai se camcta do gi .ii zei fanmo .ia
.i do mutce certu lo zu'o kalte lo ratcu gi'e
citka lo .uo dai ri se ri'a
lo nu tai xadyclu je kremle vau pe'i }
.i lo di'u ne te zu'e lo nu pluka xy ge'u selsku
sei cizra
lo dukti jalge
cu rinka
.i xy xenru vasxu gi'e cusku
{ [ mi ] pensi na gi'a na selpu'a le'o
.i se gu [ mi ] tai jerna gi'e kalte lo ratcu gi ...
[ to ] sei .oi lo darsi be tai lo remna na zasti le'o [ toi ]
[ lo remna ] fe ro lo noi lo drata cu kalte ku'o ratcu cu lebna gi'e
bevri lo puljyzda vau le'o
.i va'o ri
lo du'u ma pu kalte cu ka'e nai se djuno se ki'u
lo nu [ lo pulji ] ro roi dunda pi no mu rupnu [ = lo rupnu be li pi no mu ] vau le'o
.i lo mibzda ralpre zo'u va'u mi .o'a ba'o jerna pa pi mu no rupnu se ki'u nai
lo nu [ lo ralpre ] fe lo xamgu [ mi ] no roi friti
.i .oi lo remna cu jityxau zerle'a le'o }
.i ro'e pa'e la noi juncau ku'o xekri
lo tai ka krinu cu jimpe sei simlu .i je
tai lo za'i mutce fengu kei
fe lo xedyti'e kerfa ca'o rajgau
.i mi .io milxe xanka .i se ki'u bo
[ mi ] koi lo selcni te ji'o [ lo nu xy na se fanza ] tcica [ xy ] .i je bo
[mi ] fa'a lo zdani cu xruti
.i co'a ku mi .io nu .ai sai na kalte lo ratcu kei jdice
.i je ku'i na gasnu lo ji'a nu binxo lo xy vipsi gi'e sisku be na'e bo lo ratcu be'o cadzu
.i se mau lo nu citka kei lo nu sipna cu selkufra je pluka
.i bu'u lo ctupre zdani
lo mlatu ji'a co'a ckaji lo ka [ ce'u ] ctupre sei simlu
.i la'a ru'e ga nai na sezyku'i gi za binxo lo cantyble

ni'o
lo ctupre zo'u lo mi .io ralpre co'i ca za
facki za'a lo du'u [ ry ] na sai jai se pacna fai lo nu jauxra .i je
fi lo pe de'i li pa re pi'e pa detcku
fe la'e di'e ciska
.i { [ mi ] fe ko'a pe me'e li'o tu'i tu'a lo cabdei nunjikca pa re'u penmi
.i ti'e ko'a pu mutce frixaksu .i bo
.ie za'a [ ko'a ] se tarmi lo ka jikcre
.i ka'u lo tai prenu cu se nelci lo ninmu .i se ki'u bo
se mau lo se du'u gau ko'a [ ko'a ] pu frixaksu kei
lo se du'u se bai ko'a [ ko'a ] pu frixaksu cu drani vau pe'i
.i ti'e lo .io ko'a speni cu jibrgeica
sei .i'o nai xamgu
.i su'a so'e jursa terpinka be tu'a lo frixaksu cu ckaji lo ka ce'u ka'e nai frixaksu
.i ji'a so'i jai cu'u frixaksu cu ckaji lo ka ce'u ka'e nai frixaksu
.i lo'e go'i to'e ki'u nai lo nu na se bapli cu sretoi bancu zukte
.i sei lo mi nu te jauxra cu se simsa se'u
na'i [ lo'e go'i ] nu sisti kei jdice na ku
.i to'e ki'u nai bo
[ lo'e go'i ] du'u lo pa'e nai dai mibdza [ = vo'a ] cu jikcre kei jinvi je xalbo
.i ga nai da'i lo nu pinxe lo gusta jikru gi'a vitke lo depygeizda cu krinu lo nu da jikcre gi
mi ji'a .e'e lo xamgu jauxrapre ka'e binxo sei krinu
.i pa'a lo nu lo mi tai jauxra cu se vamji lo ka se va'u na zasti kei
se mau sai le certu poi bebna ku
lo numselkra tcetoltcacre cu jai xamgu }
lo si'o jikcre zo'u .i'e cu'i [ mi ] no'e tugni
.i ji'a lo .oi si'o lo jibrgeica speni zo'u .i'o nai xamgu
cu me lo poi lo ctuca na .ei cusku [ ke'a ] ku'o bebna sidbo .i ku'i
lo mibdza [ = lo ry ] jauxra se pe lo ka [ ce'u ] pajni cu do'a prane [ se ckaji ry ]
.i lo ralpre tai ku
lo sevzi cu jimpe .i to'e ki'u nai bo
lo ka du'ejgi cu fu'i nai na cliva [ ry ]
.i ba ze'a lo djedi be li re
fo lo pe ca li pa re pi'e vo detcku [ fa ry ] cu cusku di'e
.i { ca lo purlamcte
[ mi ] nu ge mi te jauxra da gi'e jinvi lo du'u [ da ] na sai xamgu gi'e va livypu'i [ da ] gi gau de [ da ] dasni lo crexau pirvau gi'e dadja'i lo galklibi'u [ = lo bimlranma ] kei senva
.i bu'o se ga'a lo nu [ da ] binxo tu'a lo pirvau kei
mi ku'i zi kamcreze'a
.ui sai
.i se kai ti [ tu'a mi ] crexau ju'a sei pa mei zgana lifri .i ba bo
ge nicte fanmo gi [ mi ] cikna .i je
.ue nai lo jei [ mi ] tai lo purci cu tolcre kei pa'a lo cersolri cu klina binxo .oi }
.i ry va'o lo ji'a sai se senva
lo jauxra nunxe'u za'o bevri vau za'a
.i se kai ti [ ry ] fe ge lo li'a jauxrapre gi lo ji'a pe cu'u ry jikcre cu ka'e nai binxo vau ju'a

ni'o
ca lo poi lo ralpre tu'a lo jauxra cu senva pu ku'o bavlamdei
lo bi'u nai solji greku kanminle'o melskepre ry zu ca vitke
.i my mo'u lo zu'o zutse kei
sei sirsutra { tu'a lo pixra ca mo } cfasku
.i ry fi'o flira lo norxanka
{ ti'i do [ mi ] nu te vinxra kei troci .i ku'i
ro'e ga nai te vinxra gi
lo dacti tarmi .a lo skari ke tcila nu cenba vu'o poi [ ke'a mi ] pu na'e se sanji cu co'a te jimpe za'a
.i va'o la sicmu'e
se ja'e lo nu co'a lo purci lo su'u vinxra cu se sinma kei
[ lo su'u pixra ] ba'o farvi lo tai cabna vau pe'i
.i .i'e ro'e la .andreas.del.sartos. }
.i bo [ ry ] sei fe tu'a lo detcku cu mipri
cu krefu manci tu'a .abu.dy.sy.
.i lo melskepre sei cmila
fai { je'u doi do'u
ra jifselsku }
lo stedu cu sraku
.i { ki'a }
sei ry lo du'u [ ry ] pu se tcica cu nu'o sanji
.i { ge'e la noi do ru'i macysi'a ku'o .andreas.del.sartos.
.i ra me lo poi ge'e mi ticfi'i ku'o lisri
.i lo nu do tai junri krici ra cu pu na se kanpe [ mi ] vau .u'i .u'i }
sei [ my ] se tcexajmi
.i mi .io bu'u lo korlu'a la'e di'u cu tirna .i je
lo du'u lo ry cabdei detcku ma kau ba te ciska kei
kanpe bai
.i lo di'u melskepre cu me da poi se pluka lo po'o nu vi'u bacru lo tai se toljunri gi'e tcica zo'e
.i my fi'o na cai se pensi lo nu la la .andreas.del.sartos. cuntu lo ry kamcni ma kau ba'o xlura kei
jgira tisna gi'e cusku la'e di'e
{ ge'e so'o roi lo nu [ mi ] xamjifsku kei
zo'e junri cpacu [ lo go'i ] .i bo
lo nu fe lo mutce xajmi velga'e cu rinka cu pluka
.i pu ku [ mi ] fe ko'a poi tadypre
cu cusku lo se du'u la nikolas.niklbis. fi la gibon. stidi lo nu gy se pe la noi munje banli cukta ku'o fra'asygu'e ci'ernincu'u citri zo'u fra'asybau na je gli'ico gubgau .i ja'e bo
ko'a noi mutce mojyka'e ku'o
bu'u la sni'ono ci'aske kamni se pe lo tavysla
cu junri mirsku lo mi selsku
vau sei xajmi
.i ku'i ro lo vitke noi ji'i pa no no mei cu pu ca'o jinri tirna
.i .uo nai za'u re'u xajmi fasnu
.i pu ku bu'u tu'a ko'e noi ci'askepre ku'o
co'i lo nu la la xarison. ku teofanos. noi citri lisri cu se casnu kei
mi pinka fi { ra fo lo'i citri lisri cu xagrai .i ra'u lo su'u lo ninmu ralzu'e cu mrobi'o cu jai ri'a tepcai } .i ja'e bo
lo noi ragve be fi mi zutse gi'e pu no roi cusku lo se du'u [ vo'a ] na djuno ku'o ci'askepre
{ jo'a jo'a ra je'u creselsku } cusku
.i se ni'i bo lo ji'a dei nanmu du'i mi lo bi'u nai lisri ba'o na'e tcidu sei [ mi ] facki }
.i lo [ mi .io ] nircantyble ralpre sei lo kanla cu cukla binxo cu reisku
{ lo nu [ do ] tai ticysku zo'u ga nai da'i lo se tavla ca'a ba'o tcidu [ lo lisri ] gi mo }
.i ge lo nu tcica zo'e cu na nabmi
gi ku'i lo da'i nu [ ri ] facki tu'a lo nu [ ri ] se tcica cu raktu vau vau sei ry pensi
.i my na sai cnidesku
.i { ge'e da'i co'i ra [ mi ] spusku lo se du'u ga [ mi ] pu sreta'a fi lo drata cukta gi bu'a kei fu'i }
sei sa'ei .kerker. cmila
.i lo ti melskepre ge lo slogreku kalminle'o cu dasni gi ku'i
se kai simsa la lo ma'erzai ku xekri
.i ry ge smaji gi la solri barkla [ noi sigja kagme'e ] cu djine vasxu
sei flira co se du'u mi na tai virnu
.i my sei kanla co se du'u ki'u ra [ do ] te pixra na'e kakne se'u
{ zo'o nai ku'i lo nu te pixra cu je'u nandu
.i ti'e la leonard.das.vintc. fi lo vo'a selctu cu stidi lo nu terxra lo malsi bitmu barna
.i jo'a ro'e ca lo nu ne'i lo vimku'a cu junri zgana lo sicpi jinru bitmu zo'u lo xamgu .i'o morna pixra cu rarna zasti
.i doi do'u .e'u junri te vinxra troci
.i ki'u bo ju'o sai lo cinri ba selpra [ do ] }
.i { [ do ] za'u re'u tcica [ mi ] pe'i }
.i { na'i di'u sa'e jetnu
.i [ di'u ] ca'a cizyselprije jufra .i me da poi la das.vintc ka'e cusku [ ke'a ] }
.i { .ie cizyselprije li'a }
sei ry xadba randa
.i ku'i ry nu'o ne'i lo vimku'a cu te vinxra djica za'a

ni'o
la lo ma'erzai ku xekri ba ku jai tupypo'u
.i lo xy gusminra kerfa cu ve pu'e skari jdika gi'e cliva
.i lo xy kanla noi pu cu'u mi .io melbi co zmadu lo dujricyblu ku'o
so'i kalfesti cu te derxi
.i du lo ra'u sajri'a be mi .io
fa lo nu xy gleki cirko gi'e xadytai xlabi'o
.i se de'i lo nu mi .io bu'u lo bi'u nai tcatycange xy penmi kei ro moi
fau lo nu [ mi ] reisku lo se du'u ca mo kei
{ lo mustlei ro moi vimgapci .e lo ja'orbeitci zo'u .ii ba'a nai [ mi ] toldji } se cusku [ xy ]

ni'o
lo poi xunku'u jbini jivbu [ pe'a ] lo so'o zei plita xunre ku'o pezli
cu cliva tai lo purci selsne .i je
lo poi vi lo jacpatxu lo rulskapau ru'i se cliva ku'o xunblabi rulnkazanka [ sei ka'emlia ] zo'u ji'a
ro si'e jai cliva
.i lo gucrma be li ci pi mu je se nanfa'a korlu'a lo dunra solgu'i cu clira se kuspe .i je
.i lo nu lo famcritybi'e na fasnu cu na'e ru'e rirci binxo .i se co'a bo
ji'a lo mi .io sipcando ditcu ba'o bai jdika sei simlu
ry de'i ro zu'i lo ckule cu klama
.i ga nai xruti gi sezytelne'i lo ckuku'a
.i ga nai zo'e vitke gi [ ry ] cusku lo se du'u ctuca .a'u nai .a'u nai
.i lo jauxra ji'a zo'u to'e cafne gasnu
.i la takadiastaz. ji'a zo'u se du'u xagri'a na ku kei sisti
.i lo verba zo'u .u'e na'e cando klama lo verkujyzda
.i je ga nai xruti gi sanga lo tercu'e gi'a kreboi daxykei gi'a so'o roi dadgau mi .io do'e lo rebla
mi .io lo banli na citka se ri'a lo ba'u cu'i nu na plana binxo .i
milxe kanro gi'e
ji'a na tupypo'u gi'e
de'i jmive
.i lo ratcu zo'u [ mi ] no roi kalte
.i lo djuni'u zo'u [ mi ] za'o tolnei
.i [ da mi ] za'o na te cmene .i ku'i
lo nu jarco lo [ mi ] seldji cu jitcau na'e sidju .i se ki'u bo
[ mi ] .ai sei mivmulku'e vi lo dei ctupre zdani cu cmecau mlatu
se finti la .djeims. Please report any errors to me.