Boleslaw Prus, The Mildew of the World. Translated into Esperanto by Kazimierz
Bein (Pola Antologio, Hachette, Paris, 1905, 51-53). Translated from the
Esperanto by Nick Nicholas.

lu le mledi befi le terdi li'u cu tcita di'e nefi'e la'o py. Boleslaw Prus py.
.itu'e

mi pu kansa lo spatadni goi ko'a lenu diklo la'o sy. Pu\lawy sy.
.i mi'a zutse vi lo purdi lo ta'orstizu ni'a lo cambarda rokci noi se gacri
lo mledi poi se tadju'i lemi tcecli se jikca no'u ko'a ca'o so'o nanca
ni'o mi te preti fi ledu'u zo'ekaunai te cinri ko'a le na'e dikni barna noi
grusi jo'u fagyfesyska jo'u crino jo'u pelxu jo'uke pelxu joi xunre
.i ko'a catlu mi seci'o lenu senpi
.iku'i ko'a ja'e lenu berti lenu lo na'e certu no'u mi cu tavla cu co'a ciksi
cusku
lu lei barna poi se viska do cu na'e jmive to'e se jinsa nagi'e girzu loi
jmive
.i ri noi na'eka'e se viska sepi'o lo kanla poi na se sidju cu jbena ce'o
litru ce'o gletu ce'o se jbena ce'o .uenai morsi
.i la'edi'e cu ci'irmau ke'unai
.i lei jmive cu zbasu loi sa'enai cecmu noi do viska ke'a neta'i loi skavrici
barna
.i leigo'i cu fregau le dertu poi cnita ra ku'o sesi'u lei se dzena gi'e banro
gi'e co'a darxa'u loi punai se xabju gi'e.ue simda'a
.i levi fagyfesyska barna cu dunli le'e xance leni barda
.i pu re nanca cu go'i le'e sicni befi vo fepni
.i leva cmalu ke grusi barna cu zasti pu lo nanca be li pa nagi'e se krasi
leti barda barna noi diklo le gapru be le rokci
.i ti ce ti poi pelxu jo'uke xunre joi pelxu cu simda'a
.i le pelxu pu camganra
.iku'i le jibni be ri ru'i masno livbai ra gi'e xabju zu'ipe ra
.i ko catlu le crino kujoi lenu le grusi jibni cu setca loi ba'ostu ru keiku
joi leni grusi ke linji ce mokca ce cmadaplu re'o le crino sefta li'u
.i mi fraba'u lu simsa tu'a lei remna li'u
.i le spatadni cu bacru
lu na go'i
.i levi cecmu cu claxu lo bangu .e lo larcu .e loka sanji .e loka cinmo
.isa'u lego'i na ckaji lo pruxi ja ka prenu noi se ckaji mi poi remna
.i roda ci'e lego'i cu fasnu ta'i lenu na'e sanji je zmitra jeke nelci
najenai xebni li'u

ni'o ba so'o djedi mi jbini le mintu rokci ca lo nicte
.i si'u le lunra gusni mi zgana lenu le tarmi je nilbra be lei vrici barna
cu se galfi
.i da suksa lenu catke pencu mi
.i le spatadni cu go'i
.i mi cpedu lenu ko'a zutse
.iku'i ko'a co'a sanli ja'e lenu ko'a zungau le gusni befi le lunra kei gi'e
to'e cladu lenu cmosku
.i le purdi .e le ta'orstizu .e le rokci cu canci
.i mi zgana lo to'e klina gusni .e lo cambarda ka kunti noi sruri mi
.i mi ja'e lenu cargau lemi stedu fo le mlana cu co'a viska se'o lo ckule ke
tutske tedboi noi kandi te gusni gi'e dunli fi le nilbra fe le rokci poi puzi
se jbini mi
.i le tedboi cu masno carna gi'e jarco loi vrici gugde
.i xazdo bo braplu jo'u ropno bo cmalu bo xabdaplu
.i friko .i bemro jo'u ketco

ni'o mi ja'e lenu mi tilze'a catlu cu zgana loi barna pere'o le braplu zi'enoi
mintu lei grusi jo'u fagyfesyska jo'u crino jo'u pelxu jo'uke pelxu joi xunre
poi se viska mi vi le rokci
.i le barna cu se pagbu so'i cmalu mokca noi simlu lenu na'e litru kei
gi'eku'i ca'a litru ta'i lenu lazni
.i leni lo pamei mokca cu mo'ica'u catke vo'a cu na'e zmadu nopi'enopi'ere
jgarau ca'o pa cacra
.i le mokca cu litru ta'i lenu na'e sirji gi'eju'a carna leri litru midju

ni'o lei mokca co'a jorne ce sepli ce morsi ce jmive re'o le tedboi
.iku'i ro ledi'u se viska na cinri se vamji
.i vajni fa le nunli'u be lei se pagbu barna noi brabi'o gi'e banro gi'e
co'a zasti vi loi cnino stuzi gi'e se mixre jo'u simlivbai lei se xabju
.i le tedboi ru'i carna
.ipe'i ri so'ononoroi carna
.i mi te preti fo le spatadni noi sanli jbini mi ku'o
fi lu xu ti citri loi remna li'u
.i ko'a xusra desku le stedu
.i lu .i'a.iku'i larcu ce saske vi ma li'u
.i ko'a co'a badri cmacmila
.i lu nu sanji ce prami ce xebni vi ma li'u
.i ko'a to'e cladu cmila bacru lu .u'i.uinai li'u
.i lu sa'u remna pruxi ja ka prenu vi ma li'u
.i lu .u'i.uinai li'u
.i le se tarti be ko'a cu fanza mi
.i mi te preti fi lu do mo .o'onai li'u
.icazibo mi xruti diklo le purdi ne'a le rokci noi lei na'e dikni barna
be ke'a cu se gusni fi le lunra
.i le kansa be mi cu canci
.iku'i mi cmeju'o fi ri ji'u leli'i ri ckasu joi badri