[ < ] [ > ]   [ << ] [ Up ] [ >> ]         [Top] [Contents] [Index] [ ? ]

7. ni’oni’o zemo’o fenki ke tcati kansi’u

i lo jubme cu bredi ni’a lo tricu ca’u le zdani i la cibmasti cicyractu e la mapypre cu pinxe lo tcati i la sipsmacu cu zutse jbini le remei gi’e carmi sipna i le remei cu pilno sy le nu kicne kei gi’e vregau lei bircidni sy gi’e tavla simxu ga’u le sy stedu i lu tolkufra mutce ri’i la sipsmacu sei la alis pensi i ku’i pe’i sy va’o le nu sipna cu na se vajni li’u

i le jubme cu barda i ku’i le cimei cu tagji jmaji le kojna be jy i lu canlu nomei i canlu nomei sei le remei ca le nu viska le nu la alis klama cu krixa li’u i lu canlu ba’e za’uraumei sei la alis fengu cusku li’u i abu tsebi’o lo barda birstizu bu’u lo fanmo be le jubme

i lu e’e cpacu lo vanju sei la cibmasti cicyractu cu cusku co zanru li’u

i la alis catlu piro le jubme i ku’i no na’e tcati jy cpana i lu mi na viska lo vanju sei abu piksku li’u

i lu no vy zvati sei la cibmasti cicyractu cu cusku li’u

i lu o’onai va’o la’e di’u do na clite le nu friti sei la alis fengu cusku li’u

i lu do na clite le nu tsebi’o secau le nu se zvacpe sei la cibmasti cicyractu cu cusku li’u

i lu mi na pu djuno le du’u le jubme cu me ba’e do moi sei la alis cusku i jy bredi tu’a lo za’usaicimei li’u

i lu le do kerfa cu nitcu le nu se katna sei la mapypre cu cusku li’u i my pu ze’u mutce kucli catlu la alis gi’e ca pare’u tavla

i lu ei do cilre fi lo’e nu na cusku loi prenu pinka sei la alis cusku co junri i mutce tolclite li’u

i la mapypre cu kargau lei kanla ja’e le nu mutce ganra kei ca le nu tirna di’u i ku’i my cusku lu ma te simsa lo’e cipnrkorvo lo’e ciska jubme li’u po’o

i lu ui mi ze’aba se zdile sei la alis pensi i mi gleki le nu co’a retsku loi se manci nabmi i mi jinvi le du’u mi ka’e smadi la’e di’u sei abu bacru jmina li’u

i lu xu do skudji le du’u do jinvi le du’u do ka’e facki le danfu be di’u sei la cibmasti cicyractu cu cusku li’u

i lu go’isai sei la alis cusku li’u

i lu ei do cusku le do se skudji sei la cibmasti cicyractu di’a cusku li’u

i lu mi go’i sei la alis sutra spuda i y ju’oru’e y do’anai mi skudji le mi se cusku i ka’u la’e di’u mintu li’u

i lu na mintu sei la mapypre cu cusku i do du’i ka’e cusku le du’u lu mi viska le mi se citka li’u mintu lu mi citka le mi se viska li’u li’u

i lu do du’i ka’e cusku sei la cibmasti cicyractu cu jmina le du’u lu mi nelci le mi se cpacu li’u mintu lu mi cpacu le mi se nelci li’u li’u

i lu do du’i ka’e cusku sei la sipsmacu noi simlu le ka sipna tavla cu jmina le du’u lu mi vasxu ze’a le nu sipna li’u mintu lu mi sipna ze’a le nu vasxu li’u

i lu ja’a mintu sera’a do sei la mapypre cu cusku li’u icabo le nunsnu cu te denpa i le kansi’u cu smaji zutse ze’a lo mentu ca’o le nu la alis pensi piro da poi abu morji ke’a lo’e cipnrkorvo a lo’e ciska jubme zi’e noi na mutce

i la mapypre cu pamoi lei co’u smaji i lu le xomoi be le masti cu detri sei my fa’a la alis cusku li’u i my le junla ba’o cpacu le daski gi’e ca’o xanka catlu gi’e di’inai desygau gi’e jbipu’i le my kerlo

i la alis ze’i pensi gi’e cusku lu le vomoi li’u

i lu oiri’e srera la’u lo djedi be li re sei la mapypre cu cusku i mi do pu jungau le du’u lo’e matne na mapti le minji sei my jmina li’u i my fengu catlu la cibmasti cicyractu

i lu ra ba’e xagrai lei matne sei la cibmasti cicyractu cu cumla spuda li’u

i lu go’i i ku’i la’a loi ji’a nanba spisa cu nerbi’o sei la mapypre cu pante i einai do ra pu setca sepi’o le nanba dakfu li’u

I la cibmasti cicyractu le junla cu jgari gi’e tolgei catlu gi’e jirgau le kabri tcati gi’e rere’u catlu i ku’i cycy na kakne co pensi lo se cusku poi xagmau le pamoi pinka no’u lu ga’icu’i ra ba’e xagrai lei matne li’u

i la alis pu ca’o kucli catlu ga’u le cycy janco i lu a’u xajmi junla sei abu te pinka i ue jy sinxa le du’u le xokaumoi be le masti cu detri enai ku’i le du’u makau tcika li’u

i lu ei ki’u ma ja’a go’i sei la mapypre cu cusku i xu le ba’e do junla cu sinxa le du’u le xokaumoi nanca cu detri li’u

i lu li’a na go’i sei la alis spuda co mutce sutra i ku’i la’e di’u se krinu le nu ze’u stali fa le pa nanca li’u

i lu mi’u le me ba’e mi moi sei la mapypre cu cusku li’u

i la alis cinmo le ka mutce se cfipu i le pinka be fi la mapypre cu simlu le ka noda smuni ke’a kei gi’e ku’i ja’a lojbo i lu mi na mulno jimpe sei abu serai le kamclite verai lei selka’e cu cusku li’u

i lu la sipsmacu za’ure’u sipna sei la mapypre cu cusku li’u i my falcru piso’u glare tcati le sy nazbi

i la sipsmacu cu tolsurla desygau le stedu gi’e cusku secau le nu kargau le kanla kei lu li’a li’a i di’usai pu’o pinka fi mi li’u

i lu xu do ba’o smadi tu’a le manci nabmi sei la mapypre fi la alis cusku li’u

i lu na go’i i mi te jinga sei la alis spuda i ma danfu li’u

i lu mi na te sidbo di’u lo ji’asai cmarai sei la mapypre cu cusku li’u

i lu go’ira’o sei la cibmasti cicyractu cu cusku li’u

i la alis cu tatpi patyva’u i lu pe’i do ka’e se prali le temci sei abu cusku ta’i lo xagmau be le nu xaksu ty ta’i le nu preti fa lo manci nabmi poi na se danfu li’u

i lu do romu’ei le du’u se slabu la temci du’i le nu mi no’a sei la mapypre cusku cu na pilno zo le le nu cmene ty i zo la mapti li’u

i lu mi na jimpe le du’u do skudji makau sei la alis cusku li’u

i lu li’a do na go’i sei la mapypre cu stedu muvgau tolsi’a cusku i la’a do noroi tavla ji’asai la temci li’u

i lu ieru’e sei la alis kajde spuda i ku’i ju’o ei mi darxi do’e le temci ca le nu mi cilre le nu se zgike li’u

i lu ua la’e di’u ve ciksi sei la mapypre cu cusku i ty na nelci lo’e nu darxi i ty boi romu’ei le nu se pendo do cu gasnu so’a se nelci be do ri’i le junla i mu’a da’i li so ca tcika le nu co’a tadni i banzu fa le nu do ja’aru’e stidi fi ty kei le nu le junla mo’u ze’i cukli’u i uo li pacipimu ca tcika le nu citka li’u

to lu au go’i sei la cibmasti cicyractu cu lauble sezysku li’u toi

i lu la’e di’u da’i banli ju’o sei la alis pensi cusku i ku’i va’oku mi na xagji li’u

i lu ieru’e go’i ca le cfari sei la mapypre cu cusku i ku’i e’e li pacipimu za’o tcika ze’u lo do se djica li’u

i lu xu la’e di’u tadji le nu ba’e do zukte sei la alis retsku li’u

i la mapypre cu tolgei desygau le stedu i lu na go’i sei my spuda i mi’a da’arsi’u ca le puzi cibmasti ibazibo ty fenki binxo za’adai sei my le tcati smuci le nu farja’o la cibmasti cicyractu cu pilno i fasnu ca le banli ke zgike se tigni be la risna noltruni’u i mi bilga le nu sanga di’e

 
                  i gu’irgu’i doi volratcu
                  i u’e a’u do ma klatcu

i a’u xu le selsanga do slabu li’u

i lu mi pu tirna lo simsa sei la alis cusku li’u

i lu di’a co’e sei la mapypre di’a cusku di’e

 
                  i do munje gapru vofli
                  tcatypalne simsa trofli
                          i gu’irgu’i

li’u i caku la sipsmacu cu desyzu’e gi’e co’a sanga ca le nu sipna lu gu’irgu’i gu’irgu’i li’u gi’e ze’u za’o co’e ja’e le nu sarcu fa le nu tunta sy kei le nu stigau sy

i lu no’i mi puzi ba’o mulgau le pamoi pempau sei la mapypre cu cusku ca le nu la noltruni’u cu zunti gi’e krixa lu ta catra le temci i ko le stedu ta vimcu li’u li’u

i lu oi selte’a cilce sei la alis ki’asku li’u

i lu co’a la’e di’u sei la mapypre di’a tolgei cusku ty zukte no se cpedu be mi i ca ze’e ru’i tcika fa li xa li’u

i lo carmi sidbo cu se pensi la alis i lu ua xu la’e di’u krinu le nu so’i ue tcati dacti cu zvati sei abu retsku li’u

i lu ja’a go’i sei la mapypre cu cusku je va’urpante i ru’i tcika le tcati sanmi i mi’a noroi kakne le nu lumci lei dacti ca lo jbini li’u

i lu ja’o ru’a do za’o muvdu fo lo cukla sei la alis cusku li’u

i lu go’i sa’e sei la mapypre cu cusku ca le nu so’o le dacti mo’u se xaksu li’u

i lu ku’i ma fasnu ca le nu do xruti le cfari sei la alis retsku darsi li’u

i lu e’u mi’o galfi le se casnu sei la cibmasti cicyractu cu zunti je sipfru i mi ti tatpi i mi sarji le nu da lisri zo’e le citno ninmu mi’a li’u

i lu u’u noda mi slabu sei la alis noi xanka le se stidi cu cusku li’u

i lu va’o la’e di’u la sipsmacu ba co’e sei le remei cu se krixa i ko cikybi’o doi sipsmacu li’u i le remei cu tunta sy le re mlana ca le mintu

i la sipsmacu cu masno kargau le kanla i lu mi na pu sipna sei sepi’o lo rufsu je ruble voksa sy cusku i mi pu tirna ro valsi poi do doi cimei ca’o cusku li’u

i lu ko te lisri fo mi’a sei la cibmasti cicyractu cu cusku li’u

i lu e’o go’i pe’u sei la alis cpesku li’u

i lu ji’a ko sutra sei la mapypre cu jmina iseva’onaibo do ba sipna pu le nu mulno li’u

i lu puzuvuku ci cmalu mensi zo’u sei la sipsmacu cu mutce sutra tolsisti zo elsis fa’u zo lesis fa’u zo tilis my cmene i my xabju le loldi be lo jintyke’a li’u

i lu ma my cidja sei la alis noi roroi se cinri lo’e du’u citka je pinxe makau cu cusku li’u

i lu lo’e satyjisra my cidja sei la sipsmacu ba le nu pensi ze’a lo mentu be li ji’ire cu cusku li’u

 Most people would interpret that as "about 12 minutes" :-) –adam

i lu ka’u ka’enai go’i sei la alis xendo te pinka i va’oda’iku my bilma li’u

i lu ja’a go’i sei la sipsmacu cu cusku i ba’e mutce le ka bilma li’u

i la alis troci le nu se xanri le nu le tolfadni ke jmive tadji cu simsa makau i ku’i dukse le ka cfipu abu iseki’ubo abu di’a cusku lu i ku’i ki’u ma my xabju le loldi be lo jintyke’a li’u

i lu ko za’ure’u pinxe lo tcati sei la cibmasti cicyractu fi la alis mutce junri se cusku li’u

i lu mi noroi pu pinxe sei la alis se cnixai spuda iseni’ibo mi ka’enai za’ure’u go’i li’u

i lu do skudji le du’u do ka’enai ba’e me’ire’u pinxe sei la mapypre cu cusku i frili fa le nu za’unore’u go’i li’u

i lu noda cpedu le ba’e do seljinvi sei la alis cusku li’u

i lu ma cusku loi prenu pinka caku sei la mapypre cu jinga reisku li’u

i la alis na kakne le nu spuda la’e di’u iseki’ubo abu sezyse’u le nu cpacu lo tcati e lo nanba joi matne kei gi’ebabo rere’u te preti fo la sipsmacu fi lu ki’u ma my xabju le loldi be lo jintyke’a li’u

i la sipsmacu za’ure’u pensi ze’a lo mentu be li ji’ire gi’e ba bo cusku lu jy satyjisra jintyke’a li’u

i lu o’onai no go’i cu zasti sei la alis co’a fengu cusku li’u i ku’i la mapypre e la cibmasti cicyractu cu bacru zoi sance c c sance i la sipsmacu cu pante te pinka fi lu va’o le nu do na ka’e clite kei e’e do se’adai mulgau le lisri li’u

i lu na go’i i e’o do ja’a di’a go’i sei la alis mutce cumla cusku i mi na ba za’ure’u zunti i i’a cumki fa le nu ba’e pa go’a cu zasti li’u

i lu zasti ju’o sei la sipsmacu cu se si’arxai cusku li’u i ku’i sy nalpro le nu di’a co’e i lu lei bi’unai ci cmalu mensi noi ta’o cilre fi le nu te pixra li’u

i lu pixra ma my sei la alis noi ca’o tolmorji le se nupre cu cusku li’u

i lu lo’e satyjisra sei caku la sipsmacu secau le nu pensi cu cusku li’u

i lu mi djica lo’e jinsa kabri sei la mapypre cu zunti i e’u romi’o muvdu le lamji stuzi li’u

i my muvdu ca le nu cusku i la sipsmacu my jersi i la cibmasti cicyractu cu muvdu le pu se zvati be la sipsmacu i la alis noi banzu naldjica cu basti la cibmasti cicyractu le ka ce’u zvati makau i la mapypre po’o cu se prali da le nuncenba i la alis se tolprali lo mutce ki’u le nu la cibmasti cicyractu puzi falcru le ladru botpi le cycy palta

i la alis na djica le nu za’ure’u cnixai la sipsmacu gi’eseki’ubo kajde ke tolsti cusku lu mi na jimpe i my cpacu lo’e satyjisra ma li’u

i lu ka’u ka’e cpacu lo’e djacu lo’e djacu jintyke’a sei la mapypre cu cusku isi’a li’a ka’e cpacu lo’e satyjisra lo’e satyjisra jintyke’a vau iepei doi bebna li’u

i lu ku’i my ba’e nenri le jintyke’a sei la alis fi la sipsmacu cu cusku co naljundi be le romoi pinka li’u

i lu li’a go’i sei la sipsmacu cu cusku i jintyke’a nenri li’u

i le danfu tai mutce cfipu la alis uu ja’e le nu curmi le nu la sipsmacu ca’o co’e ze’a lo nu abu na zunti

i lu my ca’o cilre fi le nu te pixra sei la sipsmacu di’a co’e li’u i sy sipfru gi’e mosra lei sy kanla ki’u le nu co’a sipydji i lu my te pixra so’i klesi be lo’e dacti i ro da poi zo my pamoi lei cmene be ke’a lerfu li’u

i lu ki’u ma zo my sei la alis cusku li’u

i lu ki’u ma naku da’i sei la cibmasti cicyractu cu cusku li’u

i la alis cu smaji

i la sipsmacu ba’o ga’orgau lei kanla ca la’e di’u gi’e ca’o co’a sipna i ku’i sy ca le nu se tunta la mapypre cu za’ure’u cikybi’o gi’e cmalu krixa gi’e di’a cusku lu li’o ro da poi zo my pamoi lei cmene be ke’a lerfu i mu’a lo mirli terkavbu e lo mluni e lo mojrango e lo mutce i ka’u da ka’e mutce i xu do su’oroi viska lo pixra be lo mutce li’u

i lu je’u uaru’e sei la alis mutce se cfipu cusku i pe’i na go’i li’u

i lu ei va’o la’e di’u do na tavla sei la mapypre cu cusku li’u

i le di’u se tolclite cu zmadu le sarji selka’e be la alis i abu selrigni gi’e sa’irbi’o gi’e to’o cadzu i la sipsmacu cu ze’i sipybi’o i no le re drata cu jundi le nu abu cliva i abu ji’ireroi trixe catlu fau le nu xadba pacna le du’u le remei cu klacpe abu i le remei ca le nu romoi se viska abu cu troci le nu setca la sipsmacu le tcati patxu

i lu ai mi noroi za’ure’u klama ba’e tu sei la alis ca le nu pluta sisku pa’o le ricmei cu cusku i traji le kambebna lei tcati kansi’u poi mi pagbu ca le nu mi jmive li’u

i abu ca le nu cusku di’u cu co’a sanji le nu pa le tricu cu ve vorme le ty nenri i lu cizra sei abu pensi i ku’i ro da cizra ca le cabdei i pe’i ai mi cazi nerkla li’u i abu nerkla

i abu cu za’ure’u zvati le clani kumfa gi’e jibni le cmalu ke blaci jubme i lu e’e mi xagmau snada ca le ca krefu sei abu sezysku li’u i pamai abu jgari le cmalu ke solji ckiku gi’e telcaugau le vorme be le purdi i remai abu co’a citka le mledi noi pu punji lo spisa be ke’a le daski ku’o co’u le nu abu cenmitre li ji’icino i cimai abu cadzu pa’o le cmalu vorlu’a i ba’e romai uo abu zvati le melbi purdi gi’e jbini lei carmi ke xrula zdani e lei lenku milxe jaurjinto


[ << ] [ >> ]           [Top] [Contents] [Index] [ ? ]

This document was generated by Apache on September 4, 2011 using texi2html 1.82.