[ < ] [ > ]   [ << ] [ Up ] [ >> ]         [Top] [Contents] [Index] [ ? ]

8. ni’oni’o bimo’o noltruni’u kelcrkroke bo foldi

i lo barda ke rozgu tricu cu jibni le vorme be le purdi i le rozgu poi xrula ty cu blabi i ku’i ci purdykurji cu cintyga’i ry lo’e xunre i la alis pensi jivni le du’u mutce cizra kei gi’e jbimaukla tezu’e le nu catlu i abu ca le nu ba’o klama cu tirna le nu pa le purdykurji cu cusku lu o’i doi mum ko na renro lo cinta mi li’u

i lu oi mi pu ka’enai rivbi sei la mum cusku i la zel catke le mi bircidni li’u

i ca la’e di’u la zel galcatlu gi’e cusku lu e’e doi mum ko roroi zungygau lo drata li’u

i lu ei ba’e do na tavla sei la mum cusku i ti’e la noltruni’u cu xusra ca le purlamdei le du’u ei vimcu le stedu do li’u

i lu ma krinu sei le tavla pamoi cu cusku li’u

i lu la’e di’u ba’e do na cuntu doi rel sei la zel cusku li’u

i lu ba’e ja’a go’i sei la mum cusku i ai mi ta jungau i krinu fa le nu sabji loi tulji genja enaiba’ibo loi sluni le jukpa li’u

i la zel bikygau le burcu gi’e co’a cusku lu ua verai lei ro toldra li’u icabo le zy kanla cu cunso se farna la alis noi sanli gi’e catlu lei purdykurji i zy ze’i sezydicra i lei drata ji’a cu trixe catlu i ro boi py dizlo krobi’o

i lu e’o do mi jungau sei la alis toldarsi milxe cusku le du’u ki’u ma do cintyga’i lei va rozgu li’u

i la mum e la zel cusku noda gi’e catlu la rel i la rel co’a kandi voksa cusku lu je’u sa’u doi citni’u ei ti ba’e xunre rozgu tricu i mi’a pu srera le nu sombo lo blabi i ro mi’a romu’ei le du’u la noltruni’u cu facki la’e di’u cu ba katna te vimcu le stedu i to’u sa’u doi citni’u mi’a zukte le mi’a xagrai pu le nu ny klama li’u i caku la mum noi pu ca’o xanka catlu le purdi cu krixa lu la noltruni’u i la noltruni’u li’u i le ci purdykurji cu sezre’o ja’e le nu le flira cu cpana le loldi i sance so’i nu stapa i la alis sruri catlu gi’e djica lo’e nu viska la noltruni’u

i klama pamoi fa pano sonci noi bevri loi grana i sy mintu le purdykurji le ka makau tarmi ce’u i clani kurfa gi’e plita gi’e se kojna lo’e xance e lo’e jamfu i jersi fa lei pano nolkansa noi ricfu se jadni loi tabjme gi’e remei cadzu du’i tu’a lei sonci i jersi fa lei noltru panzi noi panomei i lei cmalu dirba cu gleki plipe klama co xance jgari remei i roboi py se jadni loi risna i jersi fa lei vitke i so’eboi vy noltrunau ja noltruni’u i la alis fakyvi’a la blabi ractu noi jbini vy i ry sutra je xanka tavla gi’e cisma frati ro se cusku gi’e zo’a klama secau lo’e nu sanji abu i jersi fa la risna nolse’u noi bevri le noltrunau mapku sepi’o lo zirxu’e ranbu’u kicne i romoi le banli dzupoi fa ba’e le risna ke noltru remei

i la alis senpi le du’u xukau ei cnita flira vreta tai tu’a lei ci purdykurji i ku’i abu na morji le du’u ti’e la’e di’u dzupoi javni i lu ji’a ma ma prali lo’e dzupoi sei abu pensi romu’ei le du’u ei ro da cnita flira vreta ja’e le nu ka’enai viska dy li’u iseki’ubo abu sanli le se zvati gi’e denpa

i roda ca le nu le dzupoi cu crane la alis cu sisti gi’e catlu abu i la noltruni’u cu junri cusku lu ti mo li’u i ny di’u cusku la risna nolse’u noi spuda fi po’o le nu krobi’o je cisma

i lu doi bebna sei la noltruni’u cu sutydji cusku li’u i fa’a la alis ny di’a cusku lu ma do cmene doi verba li’u

i lu zo alis mi cmene doi banli nobli sei la alis clite mutce cusku li’u i ku’i abu jmina sezysku lu ua ta karda ga’i romei i ei mi ta na terpa li’u

i lu ba’e ti mo lu se cusku la noltruni’u noi farja’o lei ci purdykurji noi vreta ru’u le rozgu tricu i ny ca le nu py cnita flira vreta kei ki’u le nu le trixe morna cu mintu le me ro drata moi cu ka’enai djuno le du’u py purdykurji jikau sonci jikau nolkansa jikau panzi be ny cimei

i lu a’ucu’i sei la alis noi se spaji le nu darsi cu cusku i na cuntu ba’e mi li’u

i la noltruni’u cu binxo lo xunzi’u ri’a le nu fengu i ny ba le nu catlu abu zi lo mokca tai tu’a lo cilce danlu cu krixa lu ko le stedu ta vimcu i ko li’u

i lu nonselsmu sei la alis cladu je birti cusku li’u i la noltruni’u cu smaji

i la noltrunau cu punji le xance le birka be la noltruni’u gi’e toldarsi cusku lu ko pensi doi dirba le nu ta verba li’u

i la noltruni’u cu torni to’o la noltrunau gi’e cusku lu ko ta fa’ergau li’u la nolse’u

i la nolse’u cu kurji mutce fa’ergau sepi’o lo jamfu

i lu ko sanli sei la noltruni’u cu cpina je cladu voksa cusku li’u i le ci purdykurji ze’i sa’irbi’o gi’e co’a korcu rinsa la noltrunau e la noltruni’u e le noltru panzi e ro le drata

i lu ko ta sisti sei la noltruni’u cu krixa i do mi tolylaxygau li’u i fa’a le rozgu tricu ny di’a cusku lu do ma ca’o vi zukte li’u

i lu doi banli nobli sei la rel ca le nu cpanygau lo cidni le foldi cu cumla mutce tonga cusku i mi’a troci li’u

i lu je’e li’a sei la noltruni’u noi pu ca’o lanli lei rozgu cu cusku i ko le stedu ta vimcu li’u i le dzupoi cu di’a muvdu i ci le sonci cu stali mu’i le nu selmidycatra lei se malfu’a purdykurji noi bajra fa’a la alis mu’i le nu se marbi

i lu do le stedu na ba te vimcu sei la alis cusku li’u i abu punji py lo barda ke xrula patxu noi vi zvati i le ci sonci cu sruri klama je sisku ze’a lo mentu be li ji’ire gi’ebabo smaci jersi lei drata

i lu xu le stedu ba’o se vimcu sei la noltruni’u cu krixa li’u

i lu le stedu ba’o canci doi banli nobli sei lei sonci cu spuda krixa li’u

i lu i’e sei la noltruni’u cu krixa i xu do ka’e kelcrkroke li’u

i lei sonci cu smaji gi’e catlu la alis ki’u le nu li’a di’u preti fo abu

i lu go’i sei la alis krixa li’u

i lu ja’o e’e sei la noltruni’u cu camki’a li’u i la alis jorne le dzupoi gi’e kucli le du’u makau ba fasnu

i lu y melbi i y melbi donri sei lo mutce toldarsi se voksa ne’a abu cusku li’u i abu ca’o cadzu ne’a le blabi ractu noi ze’i catlu le abu flira

i lu mutce sei la alis cusku i la noltroni’u ma zvati li’u

i lu o’i o’i sei la ractu cu lauble je sutra tonga cusku li’u i ry xanka catlu ga’u le janco ca le nu tavla kei gi’e sezgalgau co cpana lei jmadegji gi’e jbigau le moklu le abu kerlo gi’e lauble cusku lu ri ba se selmidycatra li’u

i lu ma krinu sei la alis cusku li’u

i lu xu do pu cusku lu mi kecti li’u sei le ractu cu retsku li’u

i lu na go’i sei la alis cusku i mi nasai kecti i mi pu cusku lu ma krinu li’u li’u

i lu ny darxi lei kerlo be la noltruni’u sei la ractu co’a cusku li’u i la alis cmila krixa i lu o’i sei la ractu cu terpa tonga laurblesku i la noltruni’u do ba tirna i no’i ny pu lerci klama i la noltruni’u cu cusku li’u

i lu ko zvati le medomoi sei la noltruni’u cu lidvru voksa cusku li’u i lei prenu co’a bajra fa’a roda gi’e jalsi’u i ku’i bredi zi lo mentu be li ji’ire i le nu kelci cu cfari i la alis jinvi le du’u noroi le nunji’e pu viska lo tai kelcrkroke foldi i cpana joi skuro i le bolci cu jmive jesymabru i le mruli cu jmive fagycpi i le sonci cu krosa’ibi’o fi lei xance ku joi lei jamfu ja’e le nu bargu

i le ralju be lei nandu be la alis ca le cfari cu nu jitro le fagycpi i abu snada le nu kufra banzu punji le fy xadni noi le tuple cu dandu ku’o le cnita be le abu birka i ku’i ta’eku fy ca le nu ge le cnebo mo’u sirji gi abu bredi le nu darxi le jesymabru le fy stedu cu torni gi’e catlu fa’a le abu flira gi’e se cfipu frumu ja’e le nu abu ka’enai rivbi le nu spoja cmila i ca le nu abu ba’o punji le fy stedu le dizlo gi’e pu’o za’ure’u co’a co’e cu xajmi mutce fa le nu facki le du’u le jesymabru pu nalbolbi’o gi’e ca’o klama lo darno i ji’a ta’eku lo cmana a lo skuro cu zunti ca le nu abu djica le nu benji le jesymabru i la alis ki’u le nu le korcu sonci roroi sa’irgau gi’e dzukla lo drata pagbu be le foldi cu jivbi’o le du’u le nunkei ja’a mutce le ka nandu

i ro le kelci cu kelci ca le mintu gi’e na denpa le me ky moi gi’e ru’i toltugni gi’e damba fi lei jesymabru i baziku la noltruni’u cu fengu cinmo gi’e ca’o marxa cadzu gi’e krixa lu ko le stedu ta vimcu li’u a lu ko le stedu tu vimcu li’u ji’iparoi ro mentu

i la alis co’a cinmo le ka tolkufra i i’a abu za’o na damba la noltruni’u gi’e ku’i djuno le du’u ka’e bazi fasnu i lu va’o la’e di’u sei abu pensi mi mo i vi nelci lo’e nu vimcu lo’e stedu lo’e prenu i manci mutce fa le nu da stali le ka jmive li’u

i abu sisku lo’e tadji be le nu zi’erbi’o kei gi’e pensi le du’u xukau ka’e cliva secau le nu se viska icabo abu co’a sanji lo cizra tolcanci ne le vacri i ty cfipu abu ca le cfari i ku’i abu ba le nu catlu ty ze’a lo mentu be li ji’ire cu facki le du’u ty nu cisma kei gi’e sezysku lu ua la tcicymlatu i caku mi da ka’e tavla li’u

i lu do mo sei la mlatu ca le nu le la’u moklu cu banzu lo’e nu tavla cu cusku li’u

i la alis denpa le nu lei kanla cu tolcanci ibabo abu tu’ifru i lu na prali fi le nu tavla ta kei sei abu pensi pu le nu zvati fa le kerlo ado’anai su’o ri li’u i za lo drata mentu le mulno stedu cu tolcanci i la alis toljgari le fagycpi gi’e co’a te lisri le nunkei gi’e cinmo le ka gleki le nu da abu tirna i la mlatu cu simlu le ka jinvi le du’u pirau boi my ca se viska i no drata pagbu be my cu tolcanci

i lu mi na jinvi le du’u tu ca’o stace kelci sei la alis co’a pante tonga cusku i ro tu da’arta’a ja’e le nu na ka’e tirna le nu tavla i tu simlu le ka na steci javni fi ce’u ija do’anai noda va’o le nu de ja’a javni cu jundi de i do na se xanri le du’u tai makau cfipu fa le du’u ro le dacti cu jmive i mu’a le bargu poi ei mi ca pagre cu co’a cadzu le drata fanmo be le foldi i mi pu’o darxi le jesymabru pe la noltruni’u ije ku’i ue jy to’o bajra ca le nu viska le nu le memimoi cu jbikla li’u

i lu do nelci la noltruni’u sela’u ma sei la mlatu cu lauble voksa cusku li’u

i lu li no sei la alis cusku i ny mutce li’u icaku abu sanji le nu la noltruni’u cu jibni trixe abu gi’e tirna i seki’ubo di’a cusku lu le ka lakne fa le nu ce’u jinga iseki’ubo na vamji le temci fa le nu mo’u kelci li’u

i la noltruni’u cu cisma gi’e pagre

i do ma tavla sei la noltrunau cu cusku li’u i ny klama la alis gi’e mutce se cinri catlu le stedu be la mlatu

i lu ta mi pendo i ta tcicymlatu sei la alis cusku i e’apei mi do ta pengau li’u

i lu mi nasai nelci le nu ta simlu makau sei la noltrunau cu cusku i ku’i e’a ta cinba le mi xance va’o le nu pluka ta li’u

i mi zmanei le nu na go’i sei la mlatu cu te pinka li’u

i lu ko na tolsi’a sei la noltrunau cu cusku i ko mi na catlu tai ta li’u i ny klama le trixe be la alis ca le nu tavla

i lu lo’e mlatu ka’e catlu lo’e noltrunau sei la alis cusku i mi pu tcidu di’u lo cukta i ku’i mi na morji le du’u cy mokau li’u

i lu ei ta se vimcu sei la noltrunau cu jdice cusku li’u i ny skuta’a la noltruni’u noi ca jibni pagre lu au doi dirba do da vicygau le vi mlatu li’u

i la noltruni’u cu cikre ta’i pada ro nabmi noi barda ja cmalu i lu ko le stedu ta vimcu sei ny secau le nu fa’a catlu cu cusku li’u

i ba’e mi klagau le selmi’ecatra sei la noltrunau cu sutydji cusku li’u i ny sutra klama

i la alis cu jdice le du’u xruti gi’e viska le nu le nunkelci cu mokau icabo abu tirna le darno voksa be la noltruni’u noi cinmo krixa i abu ba’o tirna le nu ny minde le nu ci kelci cu se catra ki’u le nu ky na kelci ca le me ky moi i abu na’e nelci le jvinu be le cuntu ki’u le nu le nunkelci cu mutce le ka cfipu kei ja’e le nu abu noroi djuno le du’u xukau ca ei kelci i seki’ubo abu co’a sisku le abu jesymabru

i le jesymabru ca’o damba lo drata jesymabru i la alis jinvi le du’u la’e di’u xautce le nu kelcrkroke darxi pa cy le drata i le po’o nabmi cu nu le abu fagycpi ba’o klama le drata fanmo be le purdi gi’e bu’u tolsnada troci ga’a la alis le nu volkla lo tricu

i ca le nu abu le fagycpi ba’o kavbu gi’e xrugau kei ge le nundamba cu mulno gi lei re jesymabru na se viska i lu ku’i na vajni mutce sei la alis pensi i ro le dargu cu canci le vi mlana be le foldi li’u i abu punji fy le cnita be le abu birka ja’e le nu na ka’e za’ure’u cliva kei gi’e xruti le nu jmina tavla le pendo

i abu ca le nu ba’o xruti tu’a la tcicymlatu cu se spaji le nu facki le du’u lo prenu so’imei ba’o jmaji le sruri be ty i da’arsi’u fa le selmi’ecatra ku joi la noltrunau ku joi la noltruni’u vu’o noi ro lu’a ke’a cu tavla ca le mintu ca le nu ro drata cu smaji mutce gi’e tolkufra simlu

i la alis ca le nu tolcliva cu te cpedu le nu jdice le cuntu kei ro lu’a le cimei i ku’i abu ki’u le nu ro ri tavla ca le mintu cu mutce le ka se nandu le nu jimpe le du’u makau se cusku

i le seldau be le selmi’ecatra zo’u ka’enai katna vimcu lo stedu secau lo’e nu da poi xadni zo’u ka’e katna vimcu le stedu da i sy noroi pu zukte lo simsa i ai na co’a go’i ca le sy ca nunjmive pagbu

i le seldau be la noltrunau zo’u ro da poi ke’a se stedu zo’u da ka’e se sedycaugau i ei na cusku lo nonselsmu

i le seldau pe la noltruni’u zo’u ga da se zukte sera’a le cuntu zi lo mleca be lo temci pinosi’e gi ny ba minde fi le nu ro de se catra to le romoi pinka cu rinka le nu piro le kansi’u cu simlu le ka mutce le ka junri je xanka toi

i la alis ka’enai pensi le nu cusku na’e bo lu ta se ponse la noltroni’u i e’u preti ta ko ba’e ny li’u

i lu ny pinfu sei la noltruni’u fi le selmi’ecatra cu cusku i ko ny ti klagau li’u i le selmi’ecatra cu klama tai tu’a lo’e danti

i le stedu be la mlatu co’a kadze’a ca le nu sy cliva kei gi’e ba’o mu’o canci ca le nu sy xruti co kansa la noltroni’u iseki’ubo la noltrunau e le selmi’ecatra cu cilce bajra gi’e sisku my ca le nu lei drata cu di’a kelci


[ << ] [ >> ]           [Top] [Contents] [Index] [ ? ]

This document was generated by Apache on September 4, 2011 using texi2html 1.82.