Le Petit Prince 11

papamo'o

ni'o le remoi plini cu se xabju lo sezyjgidu'e

-- i a'e lo sinma be mi mi vitke --sei le sezyjgidu'e ca lo nu co'a viska le cmalu noltru cu vu krixa cusku

ni'oki'ubo ga'a lo sezyjgidu'e ro drata remna cu sinma sy

-- i coi do'u sei le cmalu noltru cu cusku i do dasni lo cizra mapku

-- i ti tutci lo nu mi rinsa sei le sezyjgidu'e cu spusku i ti tutci lo nu mi rinsa ca lo nu mi se ki'arzau i ku'i uinai noroiku da vi litru

-- i a'a sei le cmalu noltru noi na jimpe cu cusku

-- i ko jalsimgau lo do xance --sei le sezyjgidu'e cu stidi

ni'o le cmalu noltru cu jalsimgau lo xance i le sezyjgidu'e cu cunlo rinsa fau lo nu lafti le mapku

ni'o lu ta zdimau lo nu vitke le nolraitru li'u se sezysku le cmalu noltru i ny di'a ca'o jalsimgau lo xance i le sezyjgidu'e di'a rinsa fau lo nu lafti le mapku

ni'o baza lo mentu be li mu be'o noi nu zajba cu tatpi fa le cmalu noltru le stodi nu kelci

-- i pau lo nu le mapku cu farlu sei ny preti cusku cu se sarcu ma

ni'o ku'i le sezyjgidu'e na tirna i lo sezyjgidu'e noroi tirna na'ebo lo si'avla

-- i xu do mi ja'asai mutce sinma --sei sy fi le cmalu noltru cu preti cusku

-- i ma smuni zo sinma

-- i zo sinma cu se smuni lo du'u zgana lo nu mi traji lo ka melbi e lo ka zabna dasni e lo ka ricfu mutce e lo ka tolbebna kei fo lo se terdi

-- i ku'i ue do nonkansa lo nu se terdi

-- i e'osai ko mi sinma va'o makau

-- i mi do sinma sei le cmalu noltru fau lo nu milxe lafti lo janco cu cusku i ku'i ma prali do la'e di'u

ni'o le cmalu noltru cu cliva

ni'o lu lo makcu prenu ja'a cizra mutce li'u se cusku le cmalu noltru ri ca lo nu litru

paremo'o

---