Le Petit Prince 3

le cmalu noltru

cimo'o

ni'o mi ze'u jmibi'o lo du'u ny ba'o klama fi makau i le cmalu noltru noi retsku so'i da mi cu noroi simlu lo ka jimpe fi lo memimoi i lo cunso se bacru valsi cu di'i jungau mi roda i taiku ny ca lo nu pare'u sanji le mi vinji to mi na pirfi'i le mi vinji i lo pixra cu dukse lo ka pluja kei lo me mi moi toi cu preti cusku di'e mi

-- i le va dacti cu mo

-- i ta na dacti i ta vofli i ta vinji i ta me le mi vinji

ni'o mi jgira lo nu jungau ny lo du'u mi vofli ibabo ny ki'asku di'e

-- i ue do ba'o farlu fi lo tsani

-- i go'i --sei mi cumla cusku

-- i ua xajmi

ni'o le cmalu noltru cu bacru lo gleki nu cmila noi mutce fanza mi i mi djica lo nu da junri le mi malfunca ibabo ny jmina cusku di'e

-- i ja'o do ji'a klama fi lo tsani i ma terdi do

ni'o mi ze'i vismli lo guska'u le cizra po'u le nu ny zvati i mi bikla terpreti

-- i xu ja'o do klama fi lo drata terdi

ni'o ku'i ny na spuda i ny tolvlile deskygau le stedu ca'o lo nu catlu le mi vinji

-- i je'u do na ka'e klama fi lo darno mutce fu ta

ni'o ny jinru lo ze'u se senva ibabo ny tolse'a le mi lanpanzi le ny daski gi'e sfubu lo nu manci catlu le ny dirba

ni'o do se xanri lo du'u tai makau mi kucli gau le xadba selsku pe lo drata terdi i mi troci lo nu djuno zenba

-- i do klama fi ma doi cmalu prenu i ma stuzi le do zdani i do djica lo nu bevri le mi lanpanzi ma

ni'o ny spuda mi di'e ba lo pensi smaji

-- i xamgu fa le tanxe poi do ke'a mi dunda ku'o fi lo nu ty ca lo nicte cu selfu ly lo nu zdani

-- i li'a i ji'a mi va'o ro nu do clite cu ba dunda lo skori do tezu'e lo nu ly jorne ca lo donri i go'i lo grana

ni'o le se friti cu simlu lo ka jenca le cmalu noltru

-- i xu jorne i ue xajmi sidbo

-- i ku'i ly va'o ro nu na jorne gau do cu ba klama makau gi'e ba se cirko

ni'o le mi pendo cu za'ure'u bacru lo nu cmila

-- i ku'i ly ka'e klama ma

-- i makau i lo sirji crane be ly

ni'obabo le cmalu noltru cu junri te pinka

-- i na vajni i le mi zdani cu tai cmalu

ni'o fau lo nu ju'ocu'i badri milxe cu jmina cusku di'e

-- i da fa'a lo sirji crane cu na ka'e klama lo darno mutce

xorxes

---