Le Petit Prince 8

le cmalu noltru

bimo'o

ni'o mi ze'i cilre fi lo nu djuno fi le bi'unai xrula i ze'epu ta'e zvati le terdi be le cmalu noltru fa lo sampu mutce xrula noi se jadni papo'o djine be lo rulpezli zi'e noi ja'aru'e se canlu zi'e noi fanza noda i xy tolcanci ca lo cerni lo srasu ibabo xy canci ca lo vanci i ku'i le bi'unai xrula co'a te tsiju ca lo djedi fi da poi se bevri fo lo na te djuno i le cmalu noltru cu jibni jundi le stanycma noi na simsa lo drata stanycma i cumki fa lo nu cnino klesi lo tricrbaobao i ku'i le dzispa bazi sisti lo nu banro kei gi'e co'a zbasu lo xrula i le cmalu noltru noi zvati lo nu zvagau lo barda balji cu birti lo du'u ba barkla by fa lo se manci tolcanci i ku'i le xrula za'o na mo'u brebi'o lo nu melbi kei fi'o marbi le xy crino kumfa i xy jundi cuxna lo xy skari i xy masno lo nu dasni binxo i xy stika ro le rulpezli i xy na djica lo nu barkla fau lo nu xy mulno se cinje tai tu'a lo xrulrpapavera i xy na djica lo nu tolcanci fau na'ebo lo mulno nu dirce lo nu xy melbi i ie xy mutce lo ka meltritra i le se mipri nu xy brebi'o cu djedi li so'o gi'ebabo djedi li so'i ibabo xy ca lo cerni ca lo tcika be lo solri nu tolcanci cu jarco vo'a

ni'o xy noi pu tai tcila gunka cu cusku di'e fau lo nu sipna frumu

-- i a'i mi ja'aru'e co'a cikna i ko mi fraxu i u'u mi za'o mulno krekalsa

ni'o le cmalu noltru ka'enai rivbi lo nu manci

-- i u'e do melbi

-- i go'i pei sei le xrula cu xutla spusku i mi dunli le solri lo ka jbena ca makau

ni'o le cmalu noltru cu drani smadi lo du'u xy na mutce lo ka cumla i ku'i xy tai cnigau

-- i pe'i tcika tu'a lo cerni sanmi sei xy bazi jmina cusku i da'i do mi xendo lo nu pensi mi

ni'o le cmalu noltru fau lo nu mulno se cfipu kei ca lo nu ba'o tolcri lo jaursabytci cu vifne djacu selfu le xrula

ni'o taiku xy fanza ny fau lo nu xy badri milxe jgira i mu'a xy ca lo donri fau lo nu tavla fi lo vo kinli po'e xy cu cusku di'e le cmalu noltru

-- i e'e klama ti fa lo tirxu noi se jgalu

-- i no tirxu cu zvati le mi terdi sei le cmalu noltru cu fapro cusku i ji'a lo tirxu na citka lo srasu

-- i mi na srasu --sei le xrula cu xutla spusku

-- i ko mi fraxu

-- i mi na terpa lo tirxu i ku'i mi mutce terpa lo vacri flecu i xu do ponse lo bifmarbi

ni'o lu mutce terpa lo vacri flecu i na zabna funca lo spati sei le cmalu noltru cu zgana i le vi xrula cu mutce pluja li'u

-- i ca ro vanci do mi ba setca lo blacygai i mutce lenku bu'u le medomoi i xlali stuzi i bu'u le te klama be fi mi y

ni'o ku'i xy dicra vo'a i xy pu klama fau lo nu tsiju i xy ka'enai pu se slabu lo drata terdi i xy fau lo nu ckeji lo nu curmi lo nu da facki fi lo nu xy bregau lo tai klina jitfa cu so'uji'iciroi kafke tezu'e lo nu le cmalu noltru cu zungi

-- i xu lo bifmarbi

-- i mi pu'o klama tezu'e lo nu tolcri i ku'i do mi tavla

ni'o xy bapli lo nu kafke kei tezu'e lo nu frigau ny lo zugyselcni

ni'o taiku le cmalu noltru mu'inai lo zabna terzu'e pe lo ny nunprami bazi tolylacri xy i ny junri jundi lo na'e vajni valsi gi'e binxo lo mutce tolgei

ni'o lu ei mi pu na'e tirna xy sei ny fi mi ca lo djedi cu lacri cusku i ei da noroi tirna lo xrula i ei da xy catlu gi'e sumne i le memimoi cu clugau le mi terdi lo titla panci i ku'i mi pu na se pluka i le lisri be lo jgalu be'o noi tai fanza mi cu ei mi cnigau li'u

ni'o ny za'o lacri cusku lu mi pu na snada lo nu jimpe i ei mi pajni ji'u lo se zukte enai lo valsi i iu xy mi panci clugau gi'e te gusni i u'u eisai mi na cliva i ei mi smadi fi lo nu xy xendo poi se mipri fo lo nu xy tcica i oi lo xrula cu tai natfe tarti i ku'i mi dukse lo ka citno kei lo nu djuno kakne lo nu prami xy

xorxes

---