lu .ie.a'a .ie.o'onairu'e (cu'usa'a mi noi caki vilkla zo'a le vorme fi'o te mlixra le janco ku'o) sera'a ma pezyjicla li'u .i mi vi le zdani pu zutse co cando .icabo mi terbei lo notci poi ve cusku le se du'u lu'o la vei,on. joi la nitcion. lu'u goi ko'a noi zvati le kafybarja po'u la jbolaz. cu djica lenu penmi mi vi ra .i lu ma mo li'u na se spuda .i ko'a jundi casnu la fraktur. .i mi zo'u la fraktur. no'e cinri .i mi co'a zutse ne'a lo jubme poi lamji le me ko'a ku'o gi'e denpa lenu se zvaju'o da no'u ga ko'a gi lo selfu noida'i bevri loi ckafi mi ni'o lemi jubme cu xekri seja'e loni to'ercitno .i ra ve srakysku zo mi ce'o prami bu ce'o lu le cmacrnalgebra li'u .i mi nelci le jubme .i mi de'a morji fi la vei,on. .e la nitcion. gi'e co'a pensi .i mi si'a se cinri so'a klesi be lo sinxa ciste ra'anai ledu'u vo'e ge'ikau te javni mu'u le sucta cmacrnalgebra gi mecritli mu'u loi rarna ja rutni bangu .i la'edi'u mukti lenu mi tadni la lojban. kei noi ki'u ke'a mi zvati la jbolanzu no'i lo be'ipre cu klama co veirgau lemi selcpe po'u lo barda carmi bo ckafi gi'ebabo nalsirkla mo'ize'oku na'e mo'ifa'a le jupku'a .i .uaru'e simlu falenu ko'a ze'apu naje ca zvaju'o mi .i mi'a simxu rinsa .i la'aru'e mi bazi facki le krinu belenu sutrygau